Өфөлә күренекле ғалим Мазһар Иҫәнбаев менән хушлаштылар

Академик, иҡтисад фәндәре докторы, профессор. Өфөлә күренекле ғалим Мазһар Иҫәнбаев менән хушлаштылар. Рәсәйҙең һәм Башҡортостандың атҡаҙанған фән эшмәкәре 89-сы йәшендә вафат булды. Һуңғы көндәренә тиклем Мазһар Насип улы Рәсәй фәндәр академияһы Өфө федераль тикшеренеү үҙәгенең социаль-иҡтисади тикшеренеүҙәр институтында эшләй. Ул Башҡортостандың иҡтисади һәм социаль үҫешенең төп йүнәлештәрен әҙерләүгә ҙур өлөш индерә.

Өфөнән Бөйөк Ватан һуғышы ветераны Мөсәйрә Фәтихова 105 йәшлек юбилейын ҡаршыланы

Матур ғүмер байрамы менән уны мәктәп уҡыусылары һәм БЮТ ижади төркөмө тәбрикләне. Тулыраҡ киләһе яҙмала.

Башҡортостан шифаханаларына ихтыяж арта

Вице-премьер-Ер һәм мөлкәт мөнәсәбәттәре министры Наталья Полянская белдереүенсә, республика шифаханаларында ял итеүселәр һаны буйынса Рәсәйҙә алдынғылар иҫәбендә. Төбәктең һаулыҡты нығытыу үҙәктәрендә быйыл йәй 66 меңгә яҡын кеше булған. Ҡойо, геотермаль газ һәм ҡымыҙ ярҙамында дауаланыу иң популяр йүнәлештәр.

Башҡортостан йәш фехтование оҫталары Ҡазанда Рәсәй турнирында еңеү яуланы

Унда 15 йәшкә тиклемге кадеттар ҡатнашты. Башҡортостан йыйылма командаһы турнир һөҙөмтәһе буйынса алтын миҙалдарға лайыҡ булды. Шулай уҡ шәхси беренселектә Өфөнән Полина Перетятько көмөш миҙал алды, тип хәбәр итәләр Республика спорт министрлығынан.

2024 йыл метеокүҙәтеүҙәр тарихында иң эҫе йыл тип танылды

Ҡыш, яҙ һәм йәй айҙары төньяҡ ярымшарҙа үтә йылы булған. Шулай уҡ июль айында тәүлектәге уртаса температура буйынса рекорд теркәлгән. Синоптиктар фаразлауынса 2025 йыл да эҫе була, әммә температура буйынса үтә юғары күрһәткестәр көтөлмәй.

Ейәнсурала МХО яугиры әсәй булған

Ейәнсура районынан МХО-ла ҡатнашҡан «Юна» позывнойлы яугир әсәй булған.

Резеда – табип. МХО зонаһында госпиталдә хирург ярҙамсыһы булып эшләй. Уның һиҙгер ҡулдары күп кенә яралыларҙы аяҡҡа баҫтыра, яугирҙар барыһы ла «Юна»ға оло бәхет теләй. Теләгән изге теләктәр ысынлап та Яңы йыл байрамдарында тормошҡа аша.

6 ғинуарҙа Иҫәнғол ауылында Резеда өсөнсөгә әсәй була. Бәпескә ата-әсәһе Арсений тип исем ҡушҡан. Ғаиләлә тағы ла Искәндәр һәм Илнария исемле балалар тәрбиәләнә. Сабыйҙар ҡустыһы тыуыуына һәм, әлбиттә, әсәһенең өйҙә булыуына ҡыуанып бөтә алмай.

Махсус хәрби операцияла ҡатнашыусылар һәм уларҙың ғаиләләренә ярҙам саралары арттырыласаҡ

Махсус хәрби операцияла ҡатнашыусылар һәм уларҙың ғаиләләренә ярҙам йылында дәүләт тарафынан күрһәтелгән хәстәрлек бермә-бер артасаҡ. Был турала Башҡортостандың Ғаилә, хеҙмәт һәм халыҡты социаль яҡлау министры Ленара Иванова хөкүмәттең аҙналыҡ оператив кәңәшмәһендә белдерҙе. Әле төбәктә махсус хәрби операция яугирҙары һәм уларҙың яҡындарына ҡырҡтан ашыу ярҙам төрө күрһәтелә. Радий Хәбиров әйтеүенсә, һәр ведомство был исемлекте киңәйтеүгә үҙ өлөшөн индерергә бурыслы.

Өфөлә махсус хәрби операция ветерандарына таныҡлыҡ һәм Шайморатов миҙалы тапшырылды

Бөгөн «Ватанды һаҡлаусылар» дәүләт фондының Башҡортостан бүлексәһендә махсус хәрби операция ветерандарына таныҡлыҡ һәм Шайморатов миҙалы тапшырылды.
Таныҡлыҡ махсус хәрби операция ветерандарына тапшырыла, улар ауыр йәрәхәттәр алғандан һуң сәләмәтлек торошо буйынса хәрби хеҙмәттән азат ителгән.

Өфө «Бөтә донъя һөнәрселек ҡалаһы» статусын алыуға дәғүә итә

Был турала баш ҡала хакимиәтендә үткән матбуғат конференцияһында хәбәр ителде. Әле Бөтә донъя һөнәрселек советының жюри ағзалары эш сәфәре менән Өфөлә. Улар төрлө йүнәлештә ижад итеүсе оҫталар менән осраша, баш ҡаланың һөнәрселек йүнәлешен баһалай. Уның һөҙөмтәләре буйынса, юғары исемде биреү һорауы хәл ителәсәк.

Өфөнөң сауҙа үҙәктәренең береһендә «Йәшел шәмбе» экологик акцияһы уҙҙы

Сарала туҡыма ҡурсаҡтар, шәмдәр һәм ағастан картиналар эшләү буйынса оҫталыҡ дәрестәре ойошторолдо. Активистар кәрәкмәгән кейем-һалым ҡабул итте. Йыйылған әйберҙәр икенсел эшкәртеүгә ебәреләсәк, ә уларҙың бер өлөшө ғаиләләргә ярҙам итеү үҙәгенә тапшырыла.

Өфөлә Сергей Ғимаев кубогына хоккей буйынса турнир уҙҙы

Башҡортостанда йыл һайын Сергей Ғимаев кубогына хоккей буйынса турнир уҙа. Был хаҡта Башҡортостан башлығы Радий Хәбиров хөкүмәттең бөгөнгө оператив кәңәшмәһендә белдерҙе. 1 ғинуарҙа легендар шәхескә 70 йәш тулған булыр ине.
Сергей Ғимаев иҫтәлегенә арналған хәйриә матчы «Өфө-арена»ла үтте. Уйындың Башҡортостанда уҙыуы берҙә осраҡлы түгел, сөнки Сергей Наил улы хоккейҙағы тәүге аҙымдарын баш ҡалала башлай.

Башҡортостанда һыу буйҙарында хәүефһеҙлеккә иғтибар арта

Программаны ғәмәлгә ашырыу өсөн 247 миллион һум тотоноу ҡаралған. 250 -нән ашыу пляж булдырыу мөмкинлеге бар. Башҡортостан рәсми йыһазландырылған һыу инеү урындары буйынса Волга буйы округы төбәктәре араһында беренсе урында. Беҙҙең республикала 174 пляж булдырылған.

2026 йылда Өфөлә Дәүләт циркы төҙөкләндерелә башлай

Башҡортостан башлығы Радий Хәбиров хөкүмәттең оператив кәңәшмәһендә финанслау алған саҡта ҡатмарлыҡтар килеп тыумаһын өсөн эш проектын өйрәнергә ҡушты. Бынан тыш, ул республиканың мәҙәниәт министры Әминә Шафиҡоваға Рус драма театрын реконструкциялауҙы башлау өсөн аҡса бүлеү мәсьәләһен хәл итергә ҡушты. Шулай уҡ Радий Хәбиров Баймаҡ районының Урғаҙа ауылында социаль-мәҙәни үҙәк асыу тантанаһында ҡатнашырға йыйыныуы хаҡында хәбәр итте.

Башҡортостанда фатирҙа хайуандар һанын сикләргә тәҡдим итәләр

Республика {өкүмәтендә ошондай ҡарар проекты әҙерләнгән. Уға ярашлы, торлаҡтың һәр 18 квадрат метрында бер эт, йә ике бесәйҙән артыҡ аҫрарға ярамай. Шулай уҡ эттәр урамда хужаһыҙ йөрөмәҫкә тейеш. Уларҙы приютҡа оҙатасаҡтар. Йәмәғәт транспортында эттәрҙең мотлаҡ бәйле һәм морондоҡло булыуы шарт.

Радий Хәбиров Өфө хосписы пациенттарын Иҫке Яңы йыл байрамы менән ҡотланы

Республика башлығы Радий Хәбиров Өфө хосписы пациенттарын Иҫке Яңы йыл байрамы менән ҡотлап, изге теләктәрен еткерҙе. Учреждение асылғандан алып, йыл ярым эсендә тәүлек әйләнәһенә эшләгән стационар аша ауыр, ҡатмарлы сирҙәрҙән яфаланған, паллиатив ярҙамға мохтаж 1 меңдән ашыу өлкән кеше һәм 200-гә яҡын бала үткән.

Чат-бот ярҙамында тағы ла бер иҫерек водитель ҡулға алынды

Эскән ирҙең рулгә ултырыуын Ишембайҙан битараф булмаған кеше домофон камераһы аша күреп ҡала. Был хаҡта ул шунда уҡ дәүләт автоинспекторҙарына хәбәр итә. Полиция хеҙмәткәрҙәре тиҙ арала урынға сығып, урамдарҙың береһендә автомобилде туҡтата. 31 йәшлек водитель медицина тикшереүе үтеүҙән баш тарта, бының өсөн уға административ протокол төҙөлә.

Өфө урамдарындағы тәртипте Ситуация үҙәге көйләй

Баш ҡала хакимиәте биләмәһендә урынлашҡан берҙәм система ғәҙәттән тыш хәл, урамдарҙы таҙартыу, юл тығындары менән бәйле оператив мәғлүмәтте туплай. 117 экран аша йыйылған мәғлүмәт нигеҙендә белгестәр иғтибар талап ителгән проблеманы тиҙ арала хәл итә. Тулыраҡ мәғлүмәт киләһе яҙмала.

Рәсәйҙә сығарылыш уҡыусылары өсөн дәүләт аттестацияһын үткәреү ваҡыты асыҡланды

Мәғариф министрлығынан белдереүҙәренсә, 11 кластар өсөн берҙәм дәүләт имтихандары 23 майҙа башлана. Математиканан 27 майҙа, рус теленән 30 майҙа һынау үтә. 9-сы кластар өсөн төп дәүләт имтиханы 21 майҙан 16 июнгә тиклем дауам итә. 1 февралгә тиклем сығарылыш уҡыусылары имтихан тапшырыу буйынса ғариза бирергә тейеш.

БСТ каналы хәбәрсеһе Рәзилә Ғиниәтуллинаның туған телдәр буйынса репортажы иң яҡшыһы тип табылды

БСТ каналы хәбәрсеһе Рәзилә Ғиниәтуллина Башҡортостан дәүләт телдәрен һәм унда йәшәгән халыҡтарҙың телдәрен үҫтереүҙе иң яҡшы яҡтыртыу конкурсында беренсе урын алды.

Махсус хәрби операцияла ҡатнашыусыларҙың ғаиләләренә 40 төр ярҙам ҡаралған

Башҡортостанда махсус хәрби операцияла ҡатнашыусыларға һәм уларҙың ғаилә ағзаларына ярҙам итеү йылында мөмкин булғандың барыһын да эшләргә кәрәк. Төбәк етәксеһе Радий Хәбиров ошондай бурыс ҡуйҙы. Бөгөн республикала төрлө өлкәләргә ҡағылған 40 ярҙам сараһы әҙерләнгән.

Рәсәйҙең ҡайһы бер төбәктәре пилотһыҙ осоу аппараттары тәьҫирендә ҡалды

Ете субъект властары дрондар һөжүме тураһында хәбәр итте, тағы бер губернатор дошмандарҙың ракета һөжүме яһарға маташыуы тураһында белдерҙе. Зыян күреүселәр тураһында хәбәр ителмәй. Айырым төбәктәрҙә объекттарға зыян килтерелә. Өфө, Ҡазан, Калуга, Һарытау, Тамбов һәм тағы ла биш ҡала аэропорттарында рейстарҙы ҡабул итеүгә һәм ебәреүгә ваҡытлыса сикләүҙәр индерелә. Бер үк ваҡытта Ғәҙәттән тыш хәлдәр министрлығы яңы һөжүмдәр ихтималлығы тураһында иҫкәртә һәм граждандарҙы уяу булырға саҡыра. Шулай уҡ белгестәр дрондар һөжүм иткән осраҡта ҡайһы бер ҡағиҙәләрҙе теүәл үтәргә кәңәш итә.