Башҡортостандан оҙатылған гуманитар ярҙам Донбасҡа барып етте

Республика хәрбиҙәре, шулай уҡ яңы төбәктәрҙә йәшәүселәр өсөн тәғәйенләнгән ылауҙы парламент рәйесе Константин Толкачев оҙатып барҙы. Гуманитар ярҙам менән бергә хәрби хеҙмәткәрҙәрҙең балаларына Яңы йыл бүләктәре һәм Петровское ауылы өсөн Яңы йыл шыршыһы ебәрелде. Сираттағы 141-се гуманитар йөк «парламент» ылауы тип аталды.

Ирекмән ҡатын-ҡыҙҙар отряды Яңы йылды яугирҙар менән бергә ҡаршы алырға хәрби госпиталгә юлланды

Хәрби госпиталгә сәфәр «Беренсе тирмә» төбәк проекты буйынса ойошторола. Әлегә тиклем етешәр ҡатын-ҡыҙҙан тупланған ике төркөм махсус хәрби операция биләмәһендәге хәрби госпиталгә барып эшләп ҡайтҡан. Әле медицина учреждениеһында өсөнсө отряд эшләй. Дүртенсе яңы йыл төркөмө гүзәл заттары уларҙы алмаштырып, байрамды яугирҙар менән ҡаршы аласаҡ.

Өфөлә бер төркөм мәҙәниәт хеҙмәткәрҙәре республиканың юғары дәүләт наградаларына лайыҡ булды

Яҡынлашып килгән яңы йыл алдынан Өфөлә бер төркөм мәҙәниәт хеҙмәткәрҙәре республиканың юғары дәүләт наградаларына лайыҡ булды. Тармаҡ уңғандарын Башҡортостан Хөкүмәте Премьер-министрының 1-се урынбаҫары Урал Килсенбаев ҡотланы.

Өфө уҡыусылары ҡар бөртөктәре йыйып донъя рекорды ҡуйҙы

Өфө уҡыусылары донъя рекорды ҡуйҙы! Меңдән ашыу бала Рәсәй конструкторының яңы йыл коллекцияһынан ҡар бөртөктәре һәм йондоҙсоҡтар йыйҙы. Бының өсөн 161 меңдән ашыу деталь ҡулланылды.

Яңы йыл марафоны: Юлдаш рухиәт һәм күңел йылылығы өләшә

Йылан менән тәхеткә, «Юлдаш» көйләй бәхеткә. Радио каналы бөгөн сираттағы Яңы йыл марафонын үткәрҙе. Быйыл ижади коллектив сараны тура эфирҙан алып барҙы, баш ҡала халҡы һәм ҡунаҡтарына бүләктәр ҙә таратты.

Яңы йыл кисендә БСТ каналында яңы шоу-программа!

Телеканалыбыҙҙа 31 декабрҙә «Мәңгелек йырҙар, йондоҙҙар» программаһын ҡарағыҙ.

"Салауат Юлаев" мең һумға хоккейсы алды

"Спорт-Экспресс" хәбәр итеүенсә, Магнитогорскиҙың "Металлург"ы менән уйынсы өсөн аҡсалата компенсация тураһында килешеү бар. Скотт Уилсон Өфө командаһына күсә, уның өсөн 1 мең һум ғына түләнә. Уилсон даими беренселектә 30 уйында ҡатнашҡан, 4 шайба индергән, 3 һөҙөмтәле пас биргән.

Өфөлә Затон күперендә капиталь ремонт 9 миллиард һумға барып баҫа

Был объект 1971 йылда төҙөлгән. Транспорт һәм юл хужалығы министры вазифаһын башҡарыусы Любовь Минакова белдереүенсә, ремонт буйынса федераль программаларҙа ҡатнашыу мөмкинлеге ҡарала. 53 йыл элек Затонда Ағиҙел аша төҙөлгән күпергә ремонт кәрәк. Бында ауырлығы 10 тоннанан ашыу йөк машиналары йөрөшө тыйылды.

Яңы йылда Өфө балалар туризмы баш ҡалаһы була

Ул федераль конкурста еңеү яуланы. 2020 йылдан башлап балалар һәм ғаилә туризмы үҫешенә булышлыҡ итеү маҡсатында конкурс уҙғарылып килә. Йыл һайын балалар туризмы үҫеше буйынса проекттар күрһәтелә, төрлө төбәктәрҙән туристик бизнес вәкилдәре тәжрибә уртаҡлаша. Киләһе йылда бындай саралар Өфөлә уҙғарыла.

Өфөлә Шаҡша күперенең бөтә дүрт һыҙаты буйлап хәрәкәт башланды

Объектты асыуҙа Башҡортостан башлығы Радий Хәбиров ҡатнашты. Өфө йылғаһы аша һалынған күпер Шаҡша биҫтәһен һәм Иглин районы ауылдарын баш ҡала менән тоташтырыусы берҙән-бер артерия булып тора, әммә ул ҡәнәғәтләнерлек хәлдә булмай. Шуға ла 2023 йылдың яҙында капиталь ремонтҡа тотонорға хәл ителә. Эштәр «Хәүефһеҙ сифатлы юлдар» милли проекты сиктәрендә башҡарала.

Радий Хәбиров Кузнецов Затоны биҫтәһендә асылған поликлиника филиалдарын ҡараны

Башҡортостан башлығы Радий Хәбиров Өфөнөң Кузнецов Затоны биҫтәһендә балалар һәм өлкәндәр өсөн асылған поликлиника филиалдарын ҡараны. Ике медицина учреждениеһы ла бер үк адрес буйынса күп фатирлы йорттоң беренсе ҡатында урынлашҡан. Унда участка педиатрҙары һәм терапевтарҙан консультация алыуҙан тыш, УЗИ, ЭКГ кеүек тикшеренеүҙәр үтергә була.

Өфөлә йәшәүсе 9 йәшлек Никита Десятниковтың хыялы тормошҡа ашты

Ул бүләккә проектор алды. Малайҙың хыялы яҙылған шарҙы «Теләктәр шыршыһы» акцияһында Башҡортостандан сенатор Лилиә Ғүмәрова алған. Никитаға бүләкте Ҡыш бабай менән Ҡарһылыу тапшырҙы.

Өфөлә Шаҡша күпере асылды

Бөгөн иртән транспорт артерияһының дүрт һыҙаты буйынса ла хәрәкәт башланды. Объектты сафҡа индереүҙә Башҡортостан башлығы Радий Хәбиров ҡатнашты. Ремонт эштәре «Хәүефһеҙ сифатлы юлдар» милли проекты сиктәрендә башҡарылған.

Радий Хәбиров ҡотҡарыусыларҙы һөнәри байрамы менән тәбрикләне

Быйыл ғына ҡотҡарыусылар 2 меңдән ашыу кешенең ғүмерен һаҡлап алып ҡалған. Был турала республика башлығы Радий Хәбиров ҡотҡарыусыларҙы һөнәри байрамы уңайынан тәбрикләү тантанаһында белдерҙе.
Төбәк башлығы әйтеүенсә, ҡотҡарыусы - иң мөһим, ихтирамға лайыҡ һәм выжданлы һөнәр. Улар һәр ваҡыт үҙ бурыстарын теүәл һәм намыҫ менән үтәй.

Радий Хәбиров Кузнецов Затоны биҫтәһендә асылған яңы бүлексәләре эшмәкәрлеге менән танышты

Медицина яҡыная. Башҡортостан башлығы Радий Хәбиров Өфө поликлиникаларының Кузнецов Затоны биҫтәһендә асылған яңы бүлексәләре эшмәкәрлеге менән танышты. Күп ҡатлы йорттоң беренсе ҡатында балалар һәм өлкәндәргә беренсел ярҙам күрһәтелә. Филиалдар баш ҡала поликлиникаларын яңыртыу программаһы сиктәрендә эш башланы.

«Теләктәр шыршыһы» хыялдарҙы тормошҡа ашыра

Өфөлә сираттағы төркөм дәүләт эшмәкәрҙәре акцияла ҡатнашып, осраҡлы рәүештә балалар теләктәрен һайлап алды. Башҡортостандың Ғаилә, хеҙмәт һәм халыҡты социаль яҡлау министры Ленара Ивановаға - Өфөнән 10 йәшлек Тимурҙың Яңы йыл хыялы эләкте. Малайҙың үҙен поезд машинисы ролендә һынап ҡарағыһы килә.

Әбйәлил районында Сәриә Миржанованың тыуыуына 100 йыл тулыуға арналған сара үтте

Әбйәлилдәр ул-ҡыҙҙарын данлай. Төбәктә күренекле шәрҡиәтсе, диалектология белгесе Сәриә Миржанованың тыуыуына 100 йыл тулыуға арналған сара үтте. Ул ғалимәнең тыуған ауылы - Тал Ҡусҡарыла ойошторолдо.

Өфөлә Ләйсән Рәхмәтуллинаның «Акварелгә тоғролоҡ» күргәҙмәһе асылды

Акварелгә тоғролоҡ. Башҡортостандың халыҡ рәссамы Ләйсән Рәхмәтуллинаның баш ҡаланың 2-се балалар һынлы сәнғәт мәктәбендә асылған яңы күргәҙмәһе шулай тип атала. Тәү сиратта йәш рәссамдар өсөн тәғәйенләнгән экспозицияны ҡарарға акварель оҫтаһының ижадташ дуҫтары һәм һынлы сәнғәт белгестәре лә йыйылды.

Яңы йылда Өфөлә автобустарҙың йөрөү ваҡыты оҙайтыла

“Башавтотранс” компанияһынан белдереүҙәренсә, һүҙ 31 декабрҙән 1 ғинуарға тиклем 6-сы, 75-се, 51-се, 69-сы, 74-се һәм 226-сы маршруттар хаҡында бара. Билдәле булыуынса, ҡайһы бер рейстар башланғыс һәм аҙаҡҡы туҡталыштарҙан төнгө сәғәт 1-ҙә һәм 3-сө яртыла ҡуҙғала.

🎊БСТ каналында - «СУЛПЫЛАР - 2024» асыҡ телевизион конкурсы финалы!

Моңло йырҙар, сағыу номерҙар! Йәш йырсылар менән бер сәхнәлә эстрадабыҙ йондоҙҙары сығыш яһай!

31 декабрҙә 12:00 сәғәттә БСТ каналын ҡабыҙырға онотмағыҙ!🎊
https://vk.com/video-85076499_456255614

Дүртөйлө-Әсет трассаһы яҡты була

М-12 фдеераль трассаһы төҙөлөшө дауам итә. "Автодор" корпорацияһынан хәбәр итеүҙәренсә, Башҡортостан биләмәләрендә 60 километрҙа яҡтыртыу ҡоролмалары урынлаштырылды. Республикала 140 километрҙа 54 трансформатор станцияһы, 7 мең 700 фонарь ҡуйыу планлаштырыла. Магистралдең Дүртөйлө-Әсет участкаһы Башҡортостан, Пермь крайы, Свердловск өлкәһе аша үтә.