Башҡортостан башлығы менән тура бәйләнешкә 9 мең ярымдан ашыу ашыу мөрәжәғәт килгән

Башҡортостан башлығы менән тура бәйләнешкә 9 мең ярымдан ашыу ашыу мөрәжәғәт килгән, шул иҫәптән 290-ы видеоформатта. Был хаҡта төбәк етәксеһенең социаль коммуникациялар буйынса идаралығы етәксеһе Дмитрий Черенков хәбәр итте. Әле ҡабул ителгән һорауҙарҙы эшкәртеү дауам итә.

Шаран районында урындағы башланғыстар уңышлы тормошҡа ашырыла

Ауыл биләмәләре быйыл да был программала әүҙем ҡатнаша. Баҙғыя һәм Салмалы ауыл биләмәдәрендә үткән саралар хаҡында тулыраҡ киләһе яҙмала.

Мәжит Ғафури исемендәге Башҡорт дәүләт академия драма театрына нигеҙ һалыуынға 105 йыл тулды

Юбилей датаһына арналған тантананы төбәктең мәҙәниәт министры Әминә Шафиҡова асты. Башҡортостан сәнғәтенә һәм театр үҫешендә ҙур өлөш индергән берҙәм коллективҡа дәүләт наградалары тапшырылды. Ҡотлау өлөшөнән һуң баш режиссер Айрат Абушахманов сәхнәләштергән Ҡара йөҙҙәр» спектакле күрһәтелде

Баймаҡ ҡалаһының 5-се мәктәбендә милли көрәш буйынса район беренселеге уҙҙы

Көс һәм ҡаһарманлыҡ бәйгеһе. Баймаҡ ҡалаһының 5-се мәктәбендә милли көрәш буйынса район беренселеге уҙҙы. Турнир махсус хәрби операцияла һәләк булған батырҙарҙың яҡты иҫтәлегенә арналды.

Юрист көнө уңайынан орден-миҙалдар һәм маҡтаулы исемдәр

Башҡортостан башлығы Радий Хәбиров судьялар корпусы вәкилдәрен һөнәри байрамдары менән тәбрикләп, дәүләт наградалары тапшырҙы. Тантаналы йыйылыш республиканың Юғары судында үтте. Төбәк етәксеһе билдәләүенсә, бөгөн иҡтисад үҫешен, предприятиелар, бизнес, социаль өлкә, йәмәғәт һәм сәйәси ойошмаларҙы юридик тәьминәт һәм оҙатыуһыҙ күҙ алдына килтереү мөмкин түгел. «Һеҙҙең тикшерелгән һөнәри ҡарарҙарығыҙ республиканың алға барыуына булышлыҡ итә, күп осраҡта кешеләр яҙмышын билдәләй,»-тине Радий Хәбиров.

Радий Хәбиров «Рәсәй экспорт үҙәге» йәмғиәте директоры Вероника Никишина менән осрашты

Башҡортостан башлығы Радий Хәбиров «Рәсәй экспорт үҙәге» йәмғиәте директоры Вероника Никишина менән осрашты. Эшлекле әңгәмәлә санкциялар баҫымында иҡтисадты үҫтереү һорауҙары ҡаралды.

Башҡортостанда дүрт яңы лаборатория төҙөү өсөн мегагранттар бүленәсәк

Был проектҡа конкурс һөҙөмтәләре буйынса донъя кимәлендәге белгестәр йәлеп ителә. Мәғариф тармағында яңы маҡсатты тормошҡа ашырыу өсөн өс йылға 300 миллион һум аҡса йүнәлтелә. Был хаҡта республика етәксеһе Радий Хәбиров тура бәйләнеш барышында белдерҙе. Тулыраҡ мәғлүмәт киләһе яҙмала.

2030 йылға Башҡортостан сит илдәр менән бәйләнештәрҙе ике тапҡырға арттырырға ниәтләй

Башҡортостанда төрөк көнбағыштарын үҫтереү мөмкинлектәре Өфөлә үткән Халыҡ-ара бизнес аҙналығында ҡаралды. Бөгөн форумдың һуңғы көнөндә республика Танзания вәкилдәре менән дә осрашты. Улар март айында беренсе бизнес-миссия менән килеүе көтөлә. Логистика, тышҡы иҡтисади эшмәкәрлек һәм креатив туризм кеүек тармаҡтар айырым секция ултырыштарында тикшерелде.

Ауырғазы районынан алты яугир һәләк булғандан һуң Батырлыҡ һәм Шайморатов ордендары менән билдәләнде

Башҡортостан Хөкүмәте премьер-министры урынбаҫары вазифаһын башҡарыусы Ирек Сәғитов махсус хәрби операцияла һәләк булыусыларҙың ғаиләләренә юғары дәүләт наградалары тапшырҙы. Улар араһында мотоуҡсылар полкында батальон командиры булып хеҙмәт иткән улдарын юғалтыусы Гөлшат менән Рәфил Ҡаһармановтар ҙа бар.

Өфөләге Салауат Юлаев һәйкәле 54 мең 512 тауыш йыйған

Был бөгөн киске сәғәт 6-ға алынған мәғлүмәт. Әммә Рәсәй банкы иғлан иткән конкурста еңеү яулау өсөн был ғына етмәй. Сөнки тиҙ йөрөшлө «Метеор» теплоходы яҡынса 5 меңгә күберәк тауыш йыйып беренсе урынды биләй. Иҫегеҙгә төшөрәбеҙ, Үҙәк банк сайтында яңыртылған мең һумлыҡ купюрала һүрәт һайлау буйынса тауыш биреү бара. Асыҡ конкурста Волга буйы федераль округының 25 мөһим объекты ҡатнаша. Улар араһында башҡорт халҡының милли геройы Салауат Юлаев һәйкәле лә бар.

Өфөлә йәшәүсе Ғәйфә Шәрифуллина 100 йәшлек юбилейын ҡаршылай

Юбилярҙың йәшлеге Бөйөк Ватан һуғышы йылдарына тура килә. Ғәйфә Әхмәтғарип ҡыҙы тәүҙә колхозда, һуғыш тамамаланғас Өфө заводтарында, тимер юлында эшләй. Юбиляр менән БЮТ ижади төркөмө осрашты.

Өфөләге 2-се Республика клиник дауаханаһы 75 йыллыҡ юбилейын билдәләй

Байрам сараһы Башҡорт дәүләл академия Опера һәм балет театрында үтте. Медицина хеҙмәткәрҙәре коллективын Радий Хәбиров ҡотлап, бер төркөм табиптарға наградалар тапшырҙы.

Бөрйән районында модулле фельдшер-акушерлыҡ пункты асылды

«Тура бәйләнеш» аша республика башлығына мөрәжәғәт иткәндән һуң Бөрйән районында модулле фельдшер-акушерлыҡ пункты асылды. Яңы Собханғол ауылы халҡы медицина объектын үҙҙәре һораған. Быны улар бинаның иҫкереүенә бәйләгән. Хәҙер иһә ауылда диспансеризацияның беренсе этабын, медицина тикшереүен уңайлы шарттарҙа үтеү мөмкинлеге бар.

Башҡортостандан махсус хәрби операция биләмәһенә 139-сы гуманитар конвой оҙатылды

Йылы әйбер, хәрби кәрәк-яраҡ һәм бронялы техника - ылауҙы тыл хеҙмәтсәндәре бөртөкләп йыйған. Йолаға ярашлы, йөк машиналары тантаналы шарттарҙа ҡуҙғалды.

Өфөлә һөнәрселек аҙнаһы тамамланды

Йыл һайын уҙғарылған сарала Башҡортостандан тыш, илебеҙҙең башҡа төбәктәренә дә оҫталар ҡатнашты. Һөнәрселек аҙнаһы «Бәләкәй, урта эшҡыуарлыҡ һәм шәхси эшҡыуарлыҡ башланғысына ярҙам» милли проекты сиктәрендә уҙғарылды. Был хаҡта ентекләберәк киләһе яҙмала.

Өфөлә Ейәнсура районының яҡташтар осрашыуы уҙҙы

Бер майҙанға төбәктә тыуып, Өфөлә йәшәүсе яҡташтар, район етәкселеге һәм билдәле вәкилдәре йыйылды. Ҡунаҡтар иғтибарына ҡул оҫталарының әйберҙәре, ауыл хужалығы продукцияһы тәҡдим ителде. Эшлекле түңәрәк өҫтәлдәрҙән һуң, сара күңелле концерт менән дауам итте.

Урал аръяғының йәмәғәт башланғыстары союзы Донбасҡа сираттағы гуманитар ылау менән барҙы

Йылы ойоҡбаштарҙан алып генераторҙарға тиклем. Урал аръяғының йәмәғәт башланғыстары союзы Донбасҡа сираттағы гуманитар ылау менән барҙы. Уны республиканың көнъяҡ райондары халҡы һәм эшҡыуарҙар туплаған.

Махсус хәрби операция инвалиды йәшәгән шәхси йортҡа пандус ҡуйыу мөмкинме?

Башҡортостан Башлығы менән тура бәйләнеш барышында ошондай һорау бирелде.

Радий Хәбировҡа махсус операция ветераны, 1-се төркөм инвалиды Азамат Әйүпов мөрәжәғәт итте. “Аҡса табабыҙ. Пандус ҡуябыҙ. Мәсьәләне урындағы власть хәл итә”, - тине Радий Хәбиров.

Һорау авторы Азамат Әйүповҡа тиҙҙән ҡул менән идара ителгән автомобиль тапшырыла. 2025 йыл республикала Махсус хәрби операцияла ҡатнашыусыларға һәм уларҙың ғаилә ағзаларына ярҙам итеү йылы тип иғлан ителде.

«Беҙ һәйкәлде юҡ итергә уйламайбыҙ!»

Башҡортостан Башлығының тура бәйләнеше барышында Салауат Юлаев һәйкәлен реконструкциялауға бәйле һорауҙың булыуы тәбиғи ине. Уны журналист Рита Өмөтбаева бирҙе.

Радий Хәбиров әйтеүенсә, һәйкәлде төҙөкләндереү йыл ярым ваҡытты аласаҡ. Эштәр 2025 йылда башланасаҡ.

Бөгөн Ватан геройҙары көнө

“Беҙ ябай булмаған осорҙа – батырҙар дәүерендә йәшәйбеҙ. Башҡалар өсөн йәшәгән кешеләр бар. Улар Тыуған илде һаҡлай, Ватаныбыҙ өсөн һәләк була”, - тип яҙған социаль селтәрҙәге сәхифәһендә Башҡортостан башлығы Радий Хәбиров. Махсус хәрби операция барышында республиканан 12 яугир Рәсәй Геройы исеменә лайыҡ булды. “Ҡыҙғанысҡа ҡаршы, уларҙың араһында үлгәндән һуң ошо наградаға күрһәтелгәндәр бар. Махсус хәрби операция биләмәһендә бурысын намыҫ менән үтәгән ир-егеттәрҙең барыһына ла рәхмәт әйтәм. Улар 80 йыл элек донъяны фашизмдан азат иткән ҡаһарман олаталарының лайыҡлы дауамы. Һәр яугир алдында баш эйәм. Уларҙың батырлығы бер ҡасан да онотолмаясаҡ”, - тигән Радий Хәбиров.

Туймазы ҡалаһында 3 үҫмер аварияға осраған, уларҙың береһе һәләк булған

Юл-транспорт ваҡиғаһы Фабрика урамында теркәлә - ВАЗ автомобиле юлдан сығып түңкәрелә. Ғәҙәттән тыш хәлдәр министрлығы хеҙмәткәрҙәре йәрәхәт алған 15 һәм 17 йәшлек үҫмерҙәрҙе дауаханаға оҙата, 13 йәшлеге һәләк була. Урында тәфтиш-оператив төркөм эшләй, авария сәбәптәре буйынса тикшереү башланған. Мәғлүмәт Республика бала хоҡуҡтары буйынса тулы хоҡуҡлы вәкиленә, Мәғариф һәм фән министрлығына ебәрелгән.