Әбйәлил районының 1-се Асҡар урта мәктәбе уҡыусылары хәрбиҙәргә ярҙам күрһәтә

Ирекмәндәр ярҙамға ашыға. Әбйәлил районының 1-се Асҡар урта мәктәбе уҡыусылары хәрбиҙәргә ярҙам күрһәтә.
Белем усағының ирекмәндәр ойошмаһына әле хаҡлы ялда булған уҡытыусы Земфира Мусина нигеҙ һалған. Уның эшен дауам итеүселәр махсус хәрби операция яугирҙарына, уларҙың ғаиләләренә ярҙам итә.

Өфөлә башҡорт рок-музыкаһы үҫешенә булышлыҡ иткән ижадсыларға дәүләт наградалары тапшырылды

Өфөлә «Дәрүиш рухы» рок-концертында башҡорт рок-музыкаһы үҫешенә булышлыҡ иткән ижадсыларға дәүләт наградалары тапшырылды. Хәйбулла районының «Рух» халыҡ вокал-инструменталь рок-төркөмөн ойоштороусыһы Ғәзинур Биктимеров, шул уҡ төркөмдөң йырсыһы, үҙешмәкәр композитор, бик күп йырҙар авторы Ирек Атанов һәм йәшләй ғүмере өҙөлгән «Дәрүиш Хан» төркөмөнөң элекке солисы Дим Мәннәнгә Башҡортостандың халыҡ артисы исеме бирелде

Оҫталар ҡаласығы

Студиябыҙҙа — кейеҙ баҫыу оҫтаһы Майя ЛОҠМАНОВА.

https://vk.com/video-27097047_456285669?access_key=02f42a1825aae29043

Башҡортостан башлығы Радий Хәбиров эш сәфәре менән Краснокама районында булды

Төбәк етәксеһе Ҡуян ауылында төҙөкләндерелгән һөт заводы эшмәкәрлеге менән танышты. Өҫтөнлөклө инвестиция проекты исемлегенә индерелгән предприятиела тәүлегенә 20 тоннаға тиклем һөт продукцияһы етештерелә. Көн тәртибендә Радий Хәбиров яңыртылған Йәштәр һарайын ҡараны, Изге Елизавета Романова иҫтәлегенә һәйкәл асыу тантанаһында ҡатнашты .

Радий Хәбиров Краснокама районынан МХО-ла һәләк булған яугирҙарҙың ғаиләләре менән осрашты

Николо-Березовка ауылында Радий Хәбиров Краснокама районынан махсус хәрби операцияла һәләк булған яугирҙарҙың ғаиләләре менән осрашты. Төбәк етәксеһе хәрби хеҙмәткәрҙәрҙең туғандарының ауыр ҡайғыһын уртаҡлашты һәм уларға Генерал Шайморатов орденын тапшырҙы.

Һуңғы көндәрҙә Башҡортостандың ҡайһы бер ҡалалары ҡуйы томан ҡамауында ҡалды

Өфөлә, Стәрлетамаҡта һәм Салауатта һауала, шул иҫәптән Башгидрометүҙәк постарында бысратыусы матдәләр буйынса рөхсәт ителгән концентрацияның артыуы асыҡланған. Белгестәр раҫлауынса, саң болоттарының барлыҡҡа килеүенә насар метеорологик шарттар булышлыҡ иткән. Ел булмау сәбәпле, атмосфераның ер өҫтө ҡатламында автомобилдәрҙән һәм сәнәғәт предприятиеларынан сыҡҡан бысратыусы матдәләр тупланған.

Республикала йөрәк һәм ҡан тамырҙары ауырыуҙарын дауалау буйынса 4-се Евразия конгресы старт алды

Өфөнөң 450 йыллығына арналған сара «Торатау» конгресс-холында ике көн дауам итәсәк. Форумда Рәсәй, Беларусия, Ҡытай, Үзбәкстан, Бразилия һәм башҡа илдәрҙең кардиология белгестәре, мең ярымдан ашыу медицина хеҙмәткәрҙәренең ҡатнашыуы көтөлә.

Өфөлә «Дәрүиш рухы» тип исемләнгән концерт үтте

Өфө башҡорт рок музыкаһына сорналды. Рәсәй менән Ҡаҙағстандың XX төбәк-ара хеҙмәттәшлек форумы сиктәрендә «Көрәш һарайы»нда «Дәрүиш рухы» тип исемләнгән концерт үтте. Рок-музыка һөйөүселәрҙе йыйған мәҙәни ваҡиға төрлө быуын вәкилдәре өсөн ҙур байрамға әүерелде. Концерттан Башҡортостан башлығы ла ситтә ҡалманы.

Туймазы ҡалаһында Альбина Имаеваның ижади кисәһе үтте

Башҡортостандың атҡаҙанған мәҙәниәт хеҙмәткәре Альбина Имаева юбилейын ижади кисә менән билдәләне. «Йырҙарымда - тормошом» тип исемләнгән концерт композиторҙың тыуған төйәге Туймазы ҡалаһында үтте. Байрамда ижадсының дуҫтары, билдәле йырсылар, уҡыусылары ҡатнашты.

Хәйбулла районы Йәнтеш ауылында район мәҙәниәт йорттары араһында йыр-моң бәйгеһе ойошторолдо

Әсәләрҙең йөрәк ауазы. Ошо исем аҫтында Хәйбулла районы Йәнтеш ауылында район мәҙәниәт йорттары араһында йыр-моң бәйгеһе тәүгә ойошторолдо. Мәҙәни сараға район һәүәҫкәрҙәренән тыш, Баймаҡ районы йырсылары ла саҡырылғайны. Әсәләргә мәҙхиә йырлаған конкурс хаҡында киләһе яҙмала.

Росгвардия сержанты Салауат Дасаев Башҡортостан яугирҙарына арналған йыр яҙған

Уның видеояҙмаһы социаль селтәрҙәрҙә киң таралған. Республикала йәшәүселәр Салауатҡа рәхмәт белдергән. Йырсы махсус хәрби операция башланғандан алып ижадын Башҡортостан һәм Татарстан хәрбиҙәренә бағышлай. Йәш башҡарыусы госпиталдәрҙә сығыш яһай. Яугирҙарҙың ғаиләләре өсөн хәйриә концерттары ҡуя. Салауаттың атаһы Һамар өлкәһенең Ҡунаҡбай ауылынан. “Ир-егеттәрҙең рухын күтәреү өсөн туған телебеҙҙә йырланым. Башҡорттар – ҡыйыу яугирҙар. Милләтем менән ғорурланам. Салауат тигән бөйөк исемде атайым ҡушҡан, мин уға рәхмәтлемен”, - тип белдергән Салауат “Башинформ”агентлығына биргән интервьюһында.

Благовещен ҡалаһында «Озон» компанияһының илдәге иң ҙур логистика үҙәктәренең береһе сафҡа инде

Комплекс юғары сифатлы «А» класы биналарына ҡарай. Ул инновацион материалдар ҡулланып төҙөлгән һәм барлыҡ сифат, хәүефһеҙлек стандарттарына тап килә. Объекты асыу тантанаһында Радий Хәбиров ҡатнашты. Башҡортостан башлығы әйтеүенсә, күләмле инвестиция проектын тормошҡа ашырыу иҡтисадҡа яҡшы йоғонто яһай, бәләкәй һәм урта бизнесҡа үҫешергә мөмкинлек бирә. Эш сәфәре барышында республика етәксеһе Благовещен ҡалаһының тағы бер нисә объектында булды.

Рәсәйҙә һалым түләү ваҡыты тамамлана

2 декабргә тиклем халыҡ милек, транспорт һәм физик шәхестәрҙең мөлкәтенә һалымын, шулай уҡ 2023 йыл өсөн эш биреүсе тарафынан тотолмаған НДФЛ-ды түләргә тейеш. Мөлкәт һалымдары тулы күләмдә республика һәм муниципалитеттар бюджетына индерелә. Йыйылған аҡса халыҡтың тормош сифатын яҡшыртыуға йүнәлтелә: юлдар, ихаталар, балалар баҡсалары, мәктәптәр төҙөкләндерелә.

Иглин районының Ҡалтыман ауылында ФАП асылды

Ете ауылда йәшәүсе 2 мең 300 кешегә заманса медицина ярҙамы. Иглин районының Ҡалтыман табип амбулаторияһында халыҡҡа сифатлы медицина ярҙамы күрһәтеләсәк. Яңы медицина учреждениеһы «Сәләмәтлек» милли проекты сиктәрендә һаулыҡ һаҡлауҙың беренсел звеноһын модернизациялау программаһын тормошҡа ашырыу һөҙөмтәһендә асылды. Был хаҡта тулыраҡ киләһе яҙмала.

Баймаҡ районы Темәс ауылында күләмле төҙөкләндереү эштәренең беренсе этабы тамамланды

«Темәс - беренсе республика йөрәгҽ». «Уңайлы ҡала мөхитҽ» федераль программаһы ярҙамында Башҡортостандың тәүге баш ҡалаһында күләмле төҙөкләндереү эштәренең беренсе этабы тамамланды. Тулыраҡ киләһе яҙмала.

«Башҡортостан» мотоуҡсылар полкына концерт килде

Тыл тьәминәтендә хеҙмәт иткән, алғы һыҙыҡтан ротацияға сыҡҡан яугирҙарыбыҙ алдында Мәскәү хәрби округының фронт ижади бригадаһы сығыш яһаны. Тамашаны беҙҙең хәрби хәбәрселәр ҙә ҡараны.

«Юлдаш» мәғлүмәт һәм йыр-моң каналы йыл йомғаҡтарын барланы

Канал хеҙмәткәрҙәре йыл йырсыһын, легендаһын, халыҡ башҡарыусыһы кеүек төрлө номинациялар менән бергә, мәрхәмәтлек эшендә әүҙем ҡатнашҡан замандаштарын билдәләне. «Башҡортостан» дәүләт концерт залында ике көн дауамында барған тамаша тулы зал йыйҙы.

Башҡортостанда "Йоҡа боҙ" операцияһы оҙайтылды

Республика хөкүмәтендә йылға һәм күл буйҙарында хәүефһеҙлек тәьмин итеү мәсьәләһе ҡаралды. Вице-премьер вазифаһын башҡарыусы Ирек Сәғитов белдереүенсә, хәүефһеҙлек мәсьәләһе йыл әйләнәһенә - көнүҙәк. Бөгөн балалар һәм балыҡсыларға айырыусы иғтибар кәрәк. Район һәм ҡалаларҙа аныҡ бурыстар билдәләнде тине ул. "Йоҡа боҙ" операцияһы 1 ноябрҙә башланды. Бер айҙа республикала бер мең ярымдан ашыу профилактик рейд уҙғарылған. Операцияны артабан дауами итеү тураһында ҡарар ҡабул ителде.

Салауат Юлаев һәйкәле тауыш биреүселәр һаны буйынса әле икенсе урында

Мең һумлыҡ купюрала һүрәтләнәсәк объекттар өсөн тауыш биреү дауам итә. Рәсәй Банкы Волга буйы федераль округында 25 объектты һайлап алған. Исемлектә һәйкәл, музей, театр, университет, күперҙәр бар. Өфөләге Салауат Юлаев һәйкәле менән бергә, Ырымбурҙағы тарих музейы Ҡазан университетының төп корпусы, Һамарҙағы Дан аллеяһы, Ульяновскиҙа Волга аша күпер, Вятка художество музейы бинаһы тәҡдим ителгән. Улар араһынан бер объект яңы мең һумлыҡ аҡсала һүрәтләнергә тейеш. Еңеүсе онлайн-тауыш биреү аша асыҡлана. 12 декабргә тиклем Үҙәк Банк сайтында тауыш бирергә мөмкин.

Юлай Ильясовҡа МХО-лағы хеҙмәте өсөн Шайморатов миҙалы тапшырылды

Башҡортостан Башлығы Радий Хәбиров Юлай Ильясовты генерал Шайморатов миҙалы менән бүләкләне. Көйөргәҙе районы хакимиәте башлығы бер йыл махсус хәрби операциянан ҡайтҡандан һуң, йәнә муниципалитет хакимиәте башлығы вазифаһында эшләй башланы.

«Юлай Талха улы бер махсус хәрби операцияла ҡатнашты, ауыр хәрби бурыстарҙы үтәне. Һәр ваҡыт бәйләнештә булды, яуҙаштары хаҡында һөйләй торғайны. Беҙ һеҙгә ҙур рәхмәт белдерәбеҙ. Муниципаль хеҙмәткәр, чиновник булараҡ, шундай етди ҡарар ҡабул иттегеҙ һәм ир-егеттәребеҙгә ярҙам итергә юлландығыҙ», — тине Радий Хәбиров.

Салауат Юлаев батальоны яугирҙары ҡыҫҡа ваҡытлы ялға ҡайтты

Салауат Юлаев исемендәге 2-се башҡорт махсус тәғәйенләнеш батальоны хәрбиҙәре ҡыҫҡа ваҡытлы ялға ҡайтты. Осрашыу тантаналы шарттарҙа баш ҡалала Миңлеғәле Шайморатов һәйкәле янында үтте.