Радий Хәбиров тура эфирҙа республика халҡының һорауҙарына яуап бирәсәк

Мөһим сара 3 декабрҙә БСТ, «Рәсәй 24», «Башҡортостан 24», «Вся Уфа», «Сәләм», UTV телеканалдарында тура эфирҙа күрһәтелә, шулай уҡ уны «Юлдаш» радиоһы һәм социаль селтәрҙәр аша тыңларға һәм ҡарарға була.

Республика Башлығына өс төрлө ысул менән һорау бирергә мөмкин:

Тәүгеһе – телеграм-бот ярҙамында: t.iss.one/AskGlavaRBbot

Икенсеһе – «Дәүләт хеҙмәттәре» порталы аша: https://pos.gosuslugi.ru/lkp/direct-line/5690/

Өсөнсө ысул – Башҡортостан Башлығының рәсми сайтындағы махсус бүлек аша – https://glavarb.ru/rus/pl/

Радий Хәбиров менән тура бәйләнешкә һорауҙарҙы текст һәм видео форматында 2 декабрь киске сәғәт 19:00 сәғәткә тиклем ебәрергә мөмкин.

Башҡортостан Республикаһы Башлығы Радий Хәбиров менән тура бәйләнеш 3 декабрь киске сәғәт етелә башлана.

Радий Хәбиров эш сәфәре менән Салауат ҡалаһында булды

Башҡортостан башлығы Радий Хәбиров эш сәфәре менән Салауат ҡалаһында булды. Төбәк етәксеһе «Газпром нефтехим Салауат» йәмғиәте эшмәкәрлеге менән танышып, предприятиела көкөрт эшкәртеү буйынса яңы цех асыуҙа ҡатнашты. Бынан тыш Радий Хәбиров төҙөкләндерелгәндән һуң асылған модулле китапхана эшмәкәрлеге, «Батыр» аллеяһы торошо менән танышты.

Радий Хәбиров Салауатта «Башҡорт ихаталары» программаһы буйынса төҙөкләндерелгән биләмәлә булды

Төбәк етәксеһе Радий Хәбиров Салауат ҡалаһына эш сәфәре сиктәрендә Калинин урамында «Башҡорт ихаталары « программаһы буйынса төҙөкләндерелгән биләмәлә булды. Радий Хәбиров объекттың етешһеҙлектәрен ҡарап төҙөлөш проекты өсөн яуаплы шәхестәрҙе, проектты ҡабул итеүгә рөхсәт биреүсе етәкселәрҙе тәнҡит утында тотто. Йәшелләндереү буйынса эш, өлкәндәр өсөн ял урынын, биләмәнең ҡиәфәтен Радий Хәбиров икеле билдәһенә баһаланы. Төбәк етәксеһе был ихата төҙөлөштө нисек эшләргә түгел икәне миҫалы тип баһаланы.

Башҡортостандан яугир яуҙа аяҡһыҙ ҡалып ярты йыл госпиталдә ятҡандан һуң хәрби хеҙмәтен дауам иткән

Аяҡтар һынһа ла рух һынмаған. «Морпех» ҡушаматлы яугир яуҙа аяҡһыҙ ҡалып ярты йыл госпиталдә ятҡандан һуң да хәрби хеҙмәтен дауам иткән. Юҡҡа ғына диңгеҙ пехотаһының девизы «Ҡайҙа беҙ-шунда еңеү» тип яңғырамай. Егеттәр менән бергә килгәнмен икән, улар менән еңеп ҡайтасаҡмын, ти яугир.

«Ватанды һаҡлаусылар» дәүләт фонды ярҙамында дүрт тиҫтәнән ашыу ярҙам саралары тормошҡа ашырыла

«Ватанды һаҡлаусылар» дәүләт фондының Башҡортостан филиалында бөгөн дүрт тиҫтәнән ашыу ярҙам саралары тормошҡа ашырыла. Махсус хәрби операция яугирҙары һәм уларҙың яҡындарына ҡарата күрелгән хәстәрлек менән төбәк ойошмаһы илдә алдынғылыҡ биләй. Шунлыҡтан, киләһе йыл Бөтә Рәсәй семинарын Өфөлә уҙғарыу ҡарар ителгән. «Ватанды һаҡлаусылар» дәүләт фонды филиалы бөгөн беренсе тапҡыр социаль координаторҙары республика район һәм ҡала хакимиәте башлығы урынбаҫары менән бергә йыйҙы. Был юлы осрашыуҙа Башҡортостан Хөкүмәте, төрлө ведомство вәкилдәре ҡатнашлығында үтте.

Төбәктең 15 шифаханаһында махсус хәрби операцияла ҡатнашыусылар һәм уларҙың ғаиләләре ял итә ала

Башҡортостандың 15 шифаханаһында махсус хәрби операцияла ҡатнашыусылар һәм уларҙың ғаиләләре ял итә ала. Был дәүләт бүлгән 40-тан ашыу льготаларҙың береһе. Мөмкинлек менән республикала 5 меңгә яҡын кеше файҙаланып өлгөргән. Уларҙың береһе - яугир атаһы Ришат Әхмәтғәтин менән БЮТ ижади төркөмө аралашты.

Өфөлә Студенттар балы ойошторолдо

Сара һәр йылдағыса Ауыл хужалығы министрлығының Колонналар залында уҙҙы. Унда республиканың юғары һәм урта махсус уҡыу йорттарынан 30 пар студент һәм 21 пар уҡытыусы ҡатнашты. Йәштәрҙең рухи ҡиммәтәрен үҫтереүсе сара быйыл 8-се тапҡыр үткәрелде. Бал ғаилә йылына арналды. Ғәҙәттәгесә, байрамды Мифтахетдин Аҡмулла исемендәге Башҡорт дәүләт педагогия университетының музыка һәм хореография кафедраһы ойошторҙо.

Рөстәм Нәбиев «Дәүер кешеһе» тип танылды

Кисә Мәскәүҙә «Дәүер кешеһе 2024» премияһы еңеүселәрен бүләкләү тантанаһы уҙған. Беҙҙең яҡташыбыҙ Рөстәм Нәбиев «Тормошҡа һөйөү өсөн» наградаһына лайыҡ булған.

Өфөнөң 39-сы гимназияһында Руслан Поповҡа мемориаль таҡтаташ асылды

Өфөнөң Әғзәм Фәйзуллин исемендәге 39-сы гимназияһында махсус хәрби операцияла һәләк булған Руслан Поповҡа мемориаль таҡтаташ асылды. Руслдан Попов белем усағын 2010 йылда тамамлай. Педагогтар уны тырыш, ярҙамсыл, ғәҙел уҡыусы булараҡ хәтерләй.

Бишбүләк районы Баҙлыҡ ауылы халҡы Геройҙар паркын төҙөкләндеререгә ниәтләй

Маҡсатты тормошҡа ашырыр өсөн, улар «Урындағы башланғыстарҙы хуплау» программаһында ҡатнашып, дәүләт бюджетынан финанс ярҙам йәлеп итмәксе. Конкурста улар икенсе тапҡыр ҡатнаша, быға тиклем дәүләт ярҙамында Еңеү паркын төҙөкләндергән. Йәмғеһе бәйгелә Бишбүләк районынан 9 ауыл биләмәһе ҡатнаша. Быйыл улар программа ярҙамында 12 миллион һумға 8 проект тормошҡа ашырған.

Әсәйҙәр байрамы айҡанлы аҙ тәьмин ителгән 500 ғаиләгә аҙыҡ-түлек пакеты тапшырылды

Әсәйҙәр байрамы айҡанлы Өфөлә ишле, аҙ тәьмин ителгән 500 ғаиләгә аҙыҡ-түлек пакеты тапшырылды. Исемлектә физик мөмкинлеге сикләнгән бала тәрбиәләгәндәр ҙә бар. Аҙыҡ-түлек наборҙары «Изгелек кәрзине» онлайн-марафоны барышында тупланған. Бөгөн ирекмәндәр «Русь-аҙыҡ түлек банкы» хәйриә фондының Башҡортостан төбәк бүлексәһендә продукттарҙы пакеттарға бүлеп ғаиләләргә таратып сыҡты.

Өфөлә йәшәүсе дүрт йәшлек Давид Ғизәтовҡа ярҙам кәрәк

Дүрт йәшлек Давид Ғизәтовҡа ҡурҡыныс диагноз - мускул туҡымалары Дюшенн дистрофияһы ҡуйылған. Сабыйҙың тән күҙәнәктәре үлеүен туҡтатыу өсөн ҡиммәтле укол эшләү талап ителә. Өфөлә йәшәүсе Ғизәтовтар 265 млн һум сумманы йыйыу өсөн битараф булмаған граждандарҙың ярҙамын һорай. Давидтың ғүмерен һаҡлау өсөн ҙур булмаған сумма ла мөһим. Тулыраҡ мәғлүмәт киләһе яҙмала.
Давидҡа ярҙам итеү өсөн: Сбербанк +7(917)4041266, Тинькофф +7(917)4041266 (Ғизәтова Элина Рәшит ҡыҙы исеменә, йәки куар-код буйынса аҡса күсерергә була. Изге эшкә һәр кем ҡушыла ала.

Өфөлә тағы ла бер шыршы урынлаштырылды

Яңы йылдың төп биҙәге Октябрь районының Спорт һарайы алдында барлыҡҡа килде. Ул өс көндә ҡоролдо. Быйыл тере ҡупшыҡай урынына яһалма шыршы ҡулланыла. Был хаҡта ентекләберәк киләһе яҙмала.

Махсус хәрби операцияла ҡатнашыусы Башҡортостан яугирҙары әсәләрҙе байрам менән менән ҡотланы

Йыл һайын ноябрҙең һуңғы йәкшәмбеһендә Әсә көнө билдәләнә. Ошо уңайҙан махсус хәрби операцияла ҡатнашыусы Башҡортостан яугирҙары әсәләрҙе байрам менән менән ҡотланы. Сибай концерт-театр берекмәһе артисы Фларид Бирғәлин хеҙмәттәштәре менән бергә гүзәл заттарға башҡорт телендә моңло йыр ҙа бүләк итте.

Учалы районында Абдулла Солтановты иҫкә алдылар

Мәшһүр йырсы, ҡурайсы, башҡорт халҡының данлыҡлы улы. Учалы районында бер йыл элек арабыҙҙан киткән Абдулла Солтановты иҫкә алдылар. Шәхестең хәтер һәм хөрмәт сараһы уның тыуған алыуында башланып, Учалы филармонияһында тамамланды.

Өфөлә ойошма һәм учреждение хеҙмәткәрҙәре араһында волейбол буйынса турнир үтте

Ярыш Ғаилә йылына арналды. Республиканың баш ҡалаһында бындай форматтағы сара тәүге тапҡыр уҙғарылды. 5 коллективты бер майҙанға туплаған бәйгелә Өфө юридик институты, сәнғәт училищеһы, «Башҡортостан» дәүләт концерт залы, Ленин һәм Киров райондары хакимиәттәре, шулай Башҡортостан юлдаш телеканалы командалары көс һынашты.

Әсәй доғалары беҙҙең өсөн ныҡ кәрәк

Һеҙҙе, яугирҙәрҙең ер йөҙөндәге иң ҡәҙерле кешеләрен, матур байрам – Әсәйҙәр көнө менән ихлас күңелдән тәбрикләйбеҙ һәм ҡайнар йөрәктән сыҡҡан изге теләктәребеҙҙе еткерәбеҙ. 
Ҡәҙерле әсәйҙәребеҙ, һеҙгә рухи көс, сабырлыҡ, теләйбеҙ. Рәхмәт һеҙгә йылылыҡ, наҙ, һөйөү һәм хәстәрлек өсөн. Әсәйҙәр көнө менән!

Беҙ бергә 💪
Башҡорт батальоны.

Киләһе йылда торлаҡ-коммуналь хужалыҡ хеҙмәттәре ҡиммәтләнә

Рәсәйҙә һәр төбәк өсөн уртаса индекс раҫланды. Документҡа премьер-министр Михаил Мишустин ҡул ҡуйған. Башҡортостан өсөн уртаса индекс 14,6 процент тип билдәләнгән. Хаҡтар артыуы ошо кимәлдән 2,1 проценттан артыҡ, йә кәм булмаҫҡа тейеш. Илдә коммуналь тарифтар йыл һайын 1 июлдән ҡиммәтләнә.

Туризм хеҙмәткәрҙәре өсөн маҡтаулы исем булдырыла

Республика парламентында "Дәүләт наградалары тураһында" законға төҙәтмәләр ҡарала. Юғары һөнәри оҫталыҡ өсөн "Башҡортостандың атҡаҙанған туризм хеҙмәткәре" тигән исем бирелә. - Бындай исем хеҙмәткәрҙәр араһында конкуренцияны яҡшыртыу мөмкинлеге бирә. Уларҙың эше иҡтисад үҫешенә ҙур йоғонто яһай, әммә үҙҙәре йыш ҡына иғтибарҙан ситтә ҡала, тип белдерҙе Дәүләт Йыйылышы-Ҡоролтай рәйесе Константин Толкачев. Парламенттың пленар ултырышы 28 ноябрҙә була.

Рәсәйҙә балаһыҙ йәшәүҙе пропагандалау тыйыла

Ил президенты ошо турала законға ҡул ҡуйҙы. Документ менән рәсми мәғлүмәттәр порталында танышырға мөмкин. Бала табыуҙан баш тартырға интернетта, киң мәғлүмәт сараларында, кино һәм рекламала өндәргә ярамай. Бының өсөн ябай кешеләргә 400 мең һумға тиклем штраф ҡаралған. Ойошмалар өсөн был сумма 5 миллионға тиклем була.

Ялға ҡайтҡан хәрбиҙәр «Өфө-Арена» боҙ һарайы алдындағы майҙандан йәнә Донбасҡа юлланды

Улар махсус хәрби операцияға 2022 йылдың көҙөндә мобилизация буйынса алынған. Хеҙмәт урынына яугирҙар дүртенсе тапҡыр ялға ҡайтҡандан һуң оҙатылды. Автобусҡа шулай уҡ хәрби шарттарҙа кәрәкле әйберҙәр, аҙыҡ-түлек, йылы кейемдәр тейәлде. Ике аҙналыҡ ялда улар ғаиләләре, туғандары менән күрешкән. Яугирҙарҙы оҙатырға килгән яҡындары уларҙың Еңеү менән ҡайтыуҙарын теләне.