Термиз шаҳар ҳокимлигида янги тайинлов амалга оширилди

Термиз шаҳар ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари лавозимида Джураев Бунёд Шаниязович иш бошлади.

Б.Джураев 1983 йилда туғилган. Тошкент давлат иқтисодиёт университетини тамомлаган. Мутахассислиги – иқтисодчи.

Меҳнат фаолияти давомида турли йилларда Термиз шаҳар истеъмолчиларнинг ҳуқуқларини ҳимоя қилиш жамияти раиси, Термиз шаҳар ҳокимлиги умумий бўлими мудири, Термиз шаҳар “Ўрта Шарқ Замин” масъулияти чекланган жамияти раиси, Сурхондарё вилояти давлат архитектура-қурилиш назорат инспекцияси бош мутахассиси вазифаларида ишлаган.

Айни пайтда Сурхондарё вилояти ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари котибияти бош мутахассиси лавозимида фаолият юритаётган эди.

Сурхондарё вилояти ҳокимлиги матбуот хизмати

Таъмирлаш ишлари сабаб Олтинсойда 3 соат, Шеробод туманида 2 соат газ бўлмайди

Газ қувурларида таъмирлаш ишлари олиб борилиши сабабли жорий йилнинг 24 март куни соат 9:00 дан 12:00 гача Олтинсой тумани, соат 10:00 дан 12:00 гача Шеробод туманидаги барча аҳоли хонадонлари ва улгуржи истеъмолчиларида табиий газ таъминоти вақтинча тўхтатилади.

Таъмирлаш ишлари тугатилгандан сўнг табиий газ таъминоти қайта тикланади.

«Hududgaz Surxondaryo» газ таъминоти филиали маъмурияти таъмирлаш ишлари туфайли етказилаётган ноқулайликлар учун барча табиий газ истеъмолчиларидан узр сўрайди», — дейилади хабарда.

Сурхондарё вилояти ҳокимлиги матбуот хизмати

Туркия Қуролли Кучлари Бош штаби бошлиғи ўзбек ва турк ҳарбийларининг махсус-тактик ўқув машғулотини кузатиш учун Термизга келади

23 март куни Туркия Қуролли Кучлари Бош штаби бошлиғи, армия генерали Яшар Гулер раҳбарлигидаги делегация Ўзбекистонга ташриф буюрди. Ташриф давомида Туркия делегацияси раҳбари Ўзбекистон Қуролли Кучлари Бош штаби раҳбарияти билан учрашув ўтказди.

Туркия делегацияси вакиллари Тошкентдаги «Ғалаба боғи» ёдгорлик мажмуасига ташриф буюриши, шунингдек, «Термиз» полигонида ўтказилаётган ўзбек-турк қўшма тактик ўқувларини кузатиши кутилмоқда.

Аввалроқ ҳарбий ҳамкорлик режасига асосан Термизда ўзбек ва турк ҳарбийларининг махсус-тактик ўқув машғулоти бошлангани ҳақида хабар берган эдик.

Сурхондарё вилояти ҳокимлиги матбуот хизмати

1 апрелдан тўйлар ва бошқа оммавий тадбирларга айрим чекловлар ўрнатилади

Махсус комиссия қарори билан 1 апрелдан бошлаб Ўзбекистон ҳудудида:

✅ тўйхоналарда оилавий тантана, тўй, маърака ва маросимларни ўтказишда ташриф буюрувчилар сонини 100 кишидан оширмаслик;

✅ театр, кино (кинотеатр) ва концерт-томоша дастурларини ташкил этишда:

- томоша дастурлари ўтказиладиган саройларга ташриф буюрувчи томошабинлар ҳамда хизмат кўрсатувчи ходимларнинг қатъий ниқобда (маскада) бўлишларини таъминлаш;

- томоша дастурлари ўтказиладиган саройларнинг томошабин сиғимини инобатга олган ҳолда томошабинлар сонини 50 фоиздан оширмаслик белгиланди.

Сурхондарё вилояти ҳокимлиги матбуот хизмати

​Сохта аккаунт, сохта раҳбар, сохта ёрдам, жавобгарлик эса ҳақиқий

Президент Шавкат Мирзиёев номидан “Facebook” ижтимоий тармоғида электрон манзили бўлган сохта профиль очган фирибгар қўлга олинди. Бу ҳақида ИИБ матбуот хизмати хабар берди.

Маълум қилинишича, у фуқаролар билан мулоқотга киришганлиги, мулоқот жараёнида Ўзини Ўзбекистон Республикаси Президенти Администрацияси раҳбари деб таништириб, фойдаланувчилар билан ёзишмалар олиб борганлиги, тармоқ фойдаланувчиларига турли масалаларда айниқса уй-жой ва банк кредитлари ажратиш бўйича амалий ёрдам кўрсатилишини ваъда қилиб, алдаб фуқаролардан 50 минг сўмдан 1,5 млн. сўмгача бўлган пул маблағларини банк пластик картасига туширган ҳолда ўзлаштиргани аниқланган.

Олинган тезкор маълумотлар натижаси шуни кўрсатдики, 2021 йил 5 февраль куни Тошкент вилояти Чирчиқ шаҳри ҳудудида тезкор-техник қидирув тадбирлари ўтказилиб, ушбу ноқонуний ҳаракатларни Чирчиқ шаҳар 3-кичик туманида вақтинча яшовчи 1982 й.т., М.М. содир этганлиги аниқланиб, телефон қурилмаси ашёвий далил тариқасида ҳужжатлаштириб олинган.

Айни пайтда фуқаро М.М. га нисбатан Чирчиқ шаҳар ИИБ ҳузуридаги Тергов бўлими томонидан Жиноят кодексининг 168-моддаси 1-қисми билан жиноят иши қўзғатилиб, дастлабки тергов ҳаракатлари олиб борилмоқда.

😷Жамоат жойларида тиббий ниқоб тақиш бўйича назорат кучайтирилди

📆 24 мартдан бошлаб:

🔸жамоат жойларида, шу жумладан, йирик деҳқон бозорлари ва савдо мажмуаларида (супермаркет, гипермаркет ва бошқаларда) тиббий ниқобдан ва антисептик воситалардан фойдаланган ҳолда ҳаракатланиш бўйича санитария-гигиена талабларига қатъий риоя этилиши бўйича назорат кучайтирилди.

📆25 мартдан бошлаб:

🔹касаллик клиник белгиларсиз ёки енгил шаклда кечаётганлиги сабаб уй шароитида даволанаётган беморлар саломатлиги назорати ва даволанишини ташкил этиш мақсадида зарурат бўлган ҳудудлар бирламчи тиббий-санитария ёрдами муассасаларида мобил бригадалар фаолияти қайта йўлга қўйилади;

🚧карантин чекловларини ва санитария-эпидемиологик талабларни бузаётган фуқаролар белгиланган тартибда жавобгарликка тортилиши, шу жумладан, ушбу ҳолатларга йўл қўйган мансабдор шахсларга нисбатан қонун ҳужжатларида назарда тутилган қатъий чоралар кўрилиши белгиланди.

Сурхондарё вилояти ҳокимлиги матбуот хизмати

Таъмирлаш ишлари сабаб Жарқўрғон туманида 3 соат газ бўлмайди

Газ қувурларида таъмирлаш ишлари олиб борилиши сабабли жорий йилнинг 25 март куни соат 10:00 дан 13:00 гача Жарқўрғон туманидаги барча аҳоли хонадонлари ва улгуржи истеъмолчиларида табиий газ таъминоти вақтинча тўхтатилади.

Таъмирлаш ишлари тугатилгандан сўнг табиий газ таъминоти қайта тикланади.

«Hududgaz Surxondaryo» газ таъминоти филиали маъмурияти таъмирлаш ишлари туфайли етказилаётган ноқулайликлар учун барча табиий газ истеъмолчиларидан узр сўрайди», — дейилади хабарда.

Сурхондарё вилояти ҳокимлиги матбуот хизмати