Дьиэ кэргэн туллар тутааҕа, бигэ тирэҕэ Аҕа уонна ыал ис эйгэтин сылааһынан, тапталынан угуттуур Ийэ барахсан биир санаанан, өйдөһөн, өйөнсөн аал уоту оттон, оҕону биһиктээн Ыал диэн ытык ааты сүгэллэр. Ыал — ийэтинэн» диэн өбүгэбит бэргэн этиитэ баар. Бу өйдөбүл бүгүҥҥү күн олус суолталааҕын Ил Дархаммыт Айсен Сергеевич Николаев: «Ыал ийэтэ ситиһиилээх буоллаҕына, оҕолоро эмиэ ситиһиилээх, ыал олоҕо уйгулаах буолар», — диэн бэлиэтээбитэкөрдөрөр.
Саха сирин Ил Дархана Айсен Николаев 2022 сылы Ийэ сылынан биллэрбитэ. Ил Түмэҥҥэ туһаайыытыгар кини ийэлэр олохторуттан бүтүн уопсастыба олоҕо тутулуктаах диэн эппитэ уонна ийэлэргэ улахан болҕомтону уурарга ыҥырбыта. Улууспут Аҕа баһылыга Николай Архипович Архипов быйылгы сылы Аҕа сылынан биллэрэн, аҕа суолтата өссө улаатан, үрдээн үлэ - хамнас киэҥник ыытылынна. Бүгүҥҥү күҥҥэ дойдуга буола турар быһыыны - майгыны өйдөөн туран, улууспут аҕалара сыл түмүгүнэн кыайыылаах нэһилиэккэ бэриллиэхтээх трактор фондатын харчытын мобилиҕацияҕа көмө быһыытынан биэрэргэ диэн быһаарбыттара олус сөптөөх, дьоһун этии диэн сыаналыыбын. Улууспут бары ийэлэрэ бу күчүмэҕэй күннэргэ ыраах сылдьар дьоммутугар көмөлөһөр, кинилэри өйүүр сыаллаах, араас акциялары, тэрээһиннэри тохтоло суох ыыталлар.
Киһиэхэ киһилии сылаас сыһыан, болҕомто ууруу олус наадалаах. Маннык күчүмэҕэй күннэргэ ыһыллыбакка, олус аймаммакка, бары бэйэ - бэйэбитин өйөһөн - өйдөһөн, биир санаанан салайтаран олоруоҕуҥ.
Билигин саха ыала кыстыкка киирбит, түбүктээх күннэрэ. Бу күннэргэ бары нэһилиэктэргэ ыччат бригадалара тэриллэн, мобилизацияҕа барбыт дьоммут дьиэ кэргэттэригэр күүс - көмө буолуохтара.
Күндү дьоммут! Өссө төгүл бырааһынньыгынан эҕэрдэлиибит, хас биирдии дьиэ кэргэҥҥэ чэгиэн туругу, этэҥҥэ буолууну баҕарабыт. Ийэ сылаас тапталынан, Аҕа күүстээх санаатынан хас биирдии дьиэ кэргэн арчыланнын!

Амма улууhун баһылыгын э.т. Степан Кузьмин