Ахборот хизматлари раҳбарлари учун малака ошириш курслари ташкил этилди

Маълумки, Ўзбекистон Республикаси Президентининг 2019 йил 27 июндаги “Оммавий ахборот воситалари мустақиллигини таъминлаш ҳамда давлат органлари ва ташкилотлари ахборот хизматлари фаолиятини ривожлантириш бўйича қўшимча чора-тадбирлар тўғрисида”ги қарорида давлат органлари ва ташкилотлари ахборот хизматлари раҳбарларининг малакасини ошириш курсларини ташкил этиш белгиланган. Мазкур қарор ижроси доирасида «Ўзсувтаъминот» АЖ ва АОКА ҳамкорлигида ҳудудий сув таъминоти корхоналари ахборот хизмати раҳбар ва ходимлари учун уч кунлик ўқув курслари ташкил этилди.

Таъкидлаш жоиз, сув таъминоти ва оқова сув хизматлари соҳасида олиб борилаётган кенг кўламли ислоҳотларни жамоатчиликка тезкор ва ишончли етказиш ахборот хизматлари ходимларининг асосий вазифаларидан биридир. Шу боис курс давомида иштирокчиларга замонавий медиа ёндашувлар, самарали коммуникация усуллари ва инқирозли вазиятларда ахборот сиёсатини олиб бориш тамойиллари бўйича билим ва кўникмалар берилди.

Уч кунлик интенсив ўқув дастури қуйидаги йўналишларни ўз ичига олди:

✅ “Камера билан ишлаш ва интервью бериш маҳорати” (Журналист, телебошловчи Ҳамза Жумаев)

✅ “Ахборот хизмати фаолиятини баҳолаш мезонлари” (АОКА масъул ходими Дониёр Солиев)

✅ “Инқирозли вазиятларда ахборот хизматининг ўрни ва замонавий тенденциялар” (Медиа тадқиқотчи Гулноза Алимова)

✅ “PR технологиялар ва медиа билан ишлаш усуллари” (Медиа тадқиқотчи Наргис Қосимова)

✅ “ОАВ билан боғлиқ қонунчилик асослари” (Ҳуқуқшунос Ирода Қаҳҳорова),

Ўқув машғулотларининг қуйидаги муҳим жиҳатларини алоҳида эътиборга олиш лозим:

Иштирокчиларга амалий медиа-тадқиқотлар, реал иш жараёнидаги муаммолар бўйича спикерларнинг ўз тажрибаларидаги кейслар ва таҳлилий топшириқлар тақдим этилди.

Ҳар бир тингловчи инқирозли вазиятларни таҳлил қилиш, музокаралар олиб бориш ва медиа билан ишлаш бўйича амалий машғулотларда иштирок этди.

Шунингдек, "Ўзсувтаъминот" АЖ Ахборот хизмати раҳбари Акмал Муродов ҳамда АОКА масъул ходими Дониёр Солиевлар тизимдаги ахборот сиёсатини янада такомиллаштириш механизмларига тўхталиб ўтди.

Айтиш жоиз, иштирокчилар эгаллаган билим ва кўникмаларини ўз фаолиятларида мунтазам татбиқ этиш, соҳага янада янгича ёндашувлар асосида киришиш орқали тизимда очиқлик ва самарадорликни таъминлашларини қайд этишди.

Ўқув курслари якунида иштирокчиларга сертификатлар топширилди.

Telegram | Facebook | Instagram | Youtube | Медиабанк