Бүгүн, сэтинньи 22 күнүгэр Бүлүү өрүһү туоруур кыһыҥҥы суолга анал сулууспалар тахсаннар бэрибиэркэ ыыттылар, мууска сэрэхтээх буолуу туһунан листовкалары суоппардарга түҥэттилэр.

Хамыыһыйаҕа Саха Өрөспүүбүлүкэтин "ГИМС ГУ МЧС России" киинин судаарыстыбынай инспектора Долгунов А.В., административай хамыыһыйа бэрэсэдээтэлэ Васильева А.В., ДПС инспектора, младшай лейтенант Иванов В.В., Быыһыыр сулууспа быһааччыта Иванов И.Р. киирдилэр.

Санатан этэр буоллахха, мууһу халыҥатыы үлэ быйыл хаһааҥҥытааҕар даҕаны эрдэ ыытыллан, сэтинньи 12 күнүгэр 4 тоннаҕа диэри массыыналарга кыһыҥҥы өрүс суола арыллыбыта.

Үөһээ Бүлүү улууһун дьаһалтатын пресс сулууспата.

Сэтинньи ый 22 күнүгэр Арассыйатааҕы Ийэ күнүн көрсө Саха Өрөспүүбүлүкэтин Бырабыыталыстыбатын саалыгар элбэх оҕолоох Ийэлэргэ үрдүк наҕараадалары туттардылар.

Үөһээ Бүлүү улууһуттан 3 элбэх оҕолоох күндү Ийэлэр наҕараадалары СӨ Бырабыыталыстыбатын Бэрэсэдээтэлин Кирилл Евгеньевич Бычков илиититтэн үөрүүлээх быһыыга-майгыга туттулар.

Ол курдук, Нам нэһилиэгиттэн 10 оҕолоох Обоева Татьяна Васильевна "Дьоруой Ийэ" үрдүк аатын ылан, түөскэ кэтэр бэлиэни тутта. Үөһээ Бүлүү сэлиэнньэтиттэн 8 оҕолоох Казакова Мария Николаевна "Ийэҕэ Албан Аат" 2-с истиэпэннээх уордьанынан, Нам нэһилиэгиттэн 7 оҕолоох Романова Надежда Егоровна "Ийэҕэ Албан Аат" 3-с истиэпэннээх уордьанынан наҕараадаланнылар.

Үрдүк судаарыстыбынай наҕараадалары туппут элбэх оҕолоох Ийэлэрбитин итиитик-истиҥник эҕэрдэлиибит. Эһиги Ийэ буолар аналгытыгар эппиэтинэстээх сыһыаҥҥытыгар, кэскиллээх эдэр ыччаты иитиигэ кылааккытыгар истиҥник махтанабыт, Албан ааккытыгар сүгүрүйэбит.

Чэгиэн буолуҥ, дьоллоох буолуҥ, эдэр ыччакка холобур буолуҥ!

Үөһээ Бүлүү улууһун дьаһалтата.