Президент фармонига мувофиқ ташкил этилган “Халқаро мунозара клуби” бугундан ўз ишини бошлади.

«Юксалиш» умуммиллий ҳаракати ва «UzReport TV» телеканали томонидан ташкил этиладиган ушбу таҳлилий медиа-лойиҳада бугуннинг долзарб ижтимоий-иқтисодий ва сиёсий масалалари, глобал тенденциялар, инновацион ғоялар ва қарашлар маҳаллий ва хорижий экспертлар, парламент аъзолари, халқаро ташкилотлар вакиллари иштирокида муҳокама қилиб борилади.

“Халқаро мунозара клуби»нинг бугун бўлиб ўтадиган 1-сони Covid-19 шароитида кўрилаётган карантин чоралари ва жаҳондаги вазиятга бағишланади ва ТВ ҳамда Facebook саҳифалари орқали онлайн эфирга узатилади.

Ҳамкорларимиз — Олий Мажлис
Қонунчилик палатаси Халқаро ишлар ва парламентлараро алоқалар қўмитаси ҳамда Конрад Аденауэр жамғармасининг Марказий Осиёдаги ваколатхонаси.

Жараёнларда Сиз ҳам онлайн иштирок этишингиз мумкин.

❗️ Бугун, 8 июль, соат 15:00да!
«UzReport TV» телеканалида жонли эфирда.

@aburxanov

"Юксалиш" умуммиллий ҳаракати тўрт ой олдин мамлакатимизда эпидемиологик вазиятни яхшилашга қаратилган қатор тавсияларни илгари сурган эди. Ушбу тавсиялар орасида қуйидаги учта муҳим вазифа ҳам бор эди:

- шаҳарлар, ҳудудлар, айниқса чекка қишлоқларда тест олишга мўлжалланган мобил пунктлар ва лабораторияларни ташкил қилиш, тест натижаларини эълон қилиш бўйича ягона ахборот ресурсини ишга тушириш;

- хусусий тиббиёт муассасаларининг экспресс-тест ўтказиш бўйича ташаббусларини давлат томонидан рағбатлантириш чораларини кўриш;

- аҳолига дистанцион тиббий маслаҳат бериш тизимини яратиш, дориларни қўллаш-бўйича расмий протоколларни эълон қилиш.

COVID-19 кенг тарқалган давлатлараги эпидемиологик вазият шуни кўрсатмоқдаки, вирус тарқалишининг иккинчи ва ҳаттоки учинчи тўлқинлари ҳам бўлиши мумкин. Шундай экан, ҳали ҳам таклиф қилинган ташаббусларни амалга оширишга кеч эмас.

https://t.iss.one/bbekmurodov

Авваламбор, мени янги ташкил этилган Коррупцияга қарши курашиш агентлиги директори этиб тайинланганим муносабати билан билдирилаётган табриклар учун барчага миннатдорчилик билдираман.

Коррупция масаласи барчани бирдек ташвишга солаётган, чуқур илдиз отган иллатлигини жуда яхши тушунаман.

Эслатиб ўтмоқчиман, ушбу Агентлик Ўзбекистон учун тамомила янги тузилма ва, табиийки, асосий фаолият билан бир қаторда, ташкилий масалалар, шу жумладан, жамоани шакллантириш масаласи ҳам кун тартибида турибди.

Кўпчилик ижтимоий тармоқлардаги саҳифаларим ва бошқа алоқа воситалар орқали менга коррупция ҳолатлари юзасидан мурожаатлар юборишмоқда ва тезкор муносабат билдиришим ёки чоралар кўришимни сўрашмоқда. Шунингдек, Агентликка ишга жойлашиш истагида бўлганлар ўзлари ҳақидаги маълумотларни юбормоқдалар.

Шу муносабат билан, қуйидагиларни маълум қилмоқчиман:

Фаолиятимизнинг илк кунидан фуқароларнинг коррупция ҳолатлари ҳақида Агентликни хабардор қилиш имконини берувчи махсус дастурни ишга туширишга киришдик.

Шунингдек, Агентликка ишга қабул қилишнинг танловга асосланган, шаффоф тизимини йўлга қўйиш устида иш бошланди. Номзодларни саралаш жараёнини адолатли ташкил этиш мақсадида (соҳа мутахассислари, жамоат ва халқаро ташкилотлар вакилларидан иборат) махсус комиссия тузилади.

Яна бир бор айтаман, бу янги фаолият. Уни аввалдан тўғри йўлга қўйишга ҳаракат қиламиз. Шунинг учун ушбу ташкилий масалаларни ҳал қилиш учун бироз вақт талаб этилади.

Агентликнинг ижтимоий тармоқлардаги саҳифалари:
Telegram — t.iss.one/antikor_uzb
Facebook — https://www.facebook.com/antikoruzb
Савол, таклиф ва мурожаатлар учун: @antikoruz_bot

@aburxanov

❗️ Ўзбекистон Республикаси Коррупцияга қарши курашиш агентлиги малакали кадрларни ишга таклиф қилади

Танловда иштирок этиш истагини билдирган номзодлардан https://anticorruption.uz/konkurs/ веб-сайти орқали онлайн ариза тўлдиришлари ва ҳужжатларни электрон юборишлари сўралади.

Шунингдек, ушбу сайтда танлов ўтказиш тартиби, муддати, вакансиялар, номзодларга қўйиладиган талаблар, ҳужжат шакллари ва бошқа қўшимча маълумотлар жойлаштирилган.

✅ Саралаш жараёни қуйидаги босқичларда ўтказилади:

1. Ҳужжатлар қабули;
2. Аризалар ва ҳужжатларни кўриб чиқиш ва баҳолаш;
3. Тест синовларини ўтказиш;
4. Психологик тест ва психофизиологик кўрикдан ўтказиш (алоҳида ҳолларда полиграфологик ўрганиш ҳам ўтказилиши мумкин);
5. Индивидуал суҳбат.

Агентлик ходимларининг мансаб маоши эгаллаган лавозимидан келиб чиқиб, ўртача 10 млн сўмни ташкил этади. Бундан ташқари, мукофотлар, қўшимча тўловлар ва устамалар қўлланилади.

⚠️ Ҳужжатлар 2020 йил 3 августга қадар қабул қилинади.
👉 Мурожаат учун: @antikoruz_bot

@antikor_uzb

Бугун Ўзбекистон Республикаси Марказий сайлов комиссияси қарори билан менинг Олий Мажлис Қонунчилик палатаси депутати сифатидаги ваколатим Агентликка директор этиб тайинланганим муносабати билан муддатидан аввал тугатилди.

Шунингдек, Агентликдаги иш фаолиятимга таъсир этмаслиги учун, хусусан, манфаатлар тўқнашувига йўл қўймаслик мақсадида Ўзбекистон "Адолат" социал-демократик партияси аъзолигини ҳам тарк этишга қарор қилдим.

Олий Мажлис Қонунчилик палатаси депутати сифатида 6 йиллик фаолиятим мен учун катта мактаб бўлди. Бу янги қонун лойиҳаларини ишлаб чиқишдан тортиб, сайлов округимда фуқаролар мурожаатлари билан ишлашгача бўлган ғоят қизиқ ва масъулиятли бурч!

Ўйлайманки, шу йиллар давомида давлатимиз раҳбари бошчилигида амалга оширилаётган ислоҳотлар жараёнида орттирилган тажриба келгусида қўл келади. Юртимиз ривожига озми-кўпми ҳисса қўшишга ҳаракат қилишда давом этамиз.

Шунга қарамай, Коррупцияга қарши курашиш агентлиги Олий Мажлис Қонунчилик палатаси ва Сенати, сиёсий партиялар билан яқин ҳамкорликда ишлайди.

Доим ҳамкорликка тайёрмиз! Раҳмат!

@aburxanov

❗️ Аризалар қабули якунланди. Тест синовларига қўйилган номзодлар рўйхати 17 август куни эълон қилинади

Жорий йилнинг 23 июль — 5 август кунлари давомида Коррупцияга қарши курашиш агентлиги томонидан малакали кадрларни ишга қабул қилиш бўйича эълон қилинган танловга аризалар қабул қилинди. Республиканинг барча ҳудудларидан жами 13 минг 186 та аризалар келиб тушди. Ушбу жараёнларда инсон омилини камайтириш мақсадида барча ҳужжатлар электрон тарзда махсус веб-сайт орқали қабул қилинди.

Саралаш жараёнларининг шаффоф ва адолатли ўтишини таъминлаш мақсадида давлат ва жамоат ташкилотлари вакилларидан иборат комиссия тузилди ва унинг илк йиғилиши жорий йилнинг 6 август куни бўлиб ўтди. Йиғилишда комиссия аъзолари келиб тушган аризаларнинг эълон қилинган малака талабларига мослигини текшириш ҳамда техник камчиликлар (тўлиқ тўлдирилмаган ёки нотўғри тўлдирилган, бир неча бор топширилган аризалар)га эга аризаларни кўриб чиқишга келишиб олдилар.

Шунингдек, Ўзбекистон Республикаси Президентининг 2020 йил 29 июндаги “Ўзбекистон Республикасида коррупцияга қарши курашиш тизимини такомиллаштириш бўйича қўшимча чора-тадбирлар тўғрисида”ги ПФ-6013-сон Фармонига мувофиқ, коррупцияга қарши курашиш соҳасида амалий иш тажрибасига эга ва Агентлик зиммасига юклатилган вазифаларни профессионал даражада бажаришга қодир шахслар орасидан тўлдириш мақсадида ҳар бир номзоднинг ихтисослашуви, мутахассислиги (олий маълумот тўғрисидаги диплом бўйича), орттирган иш тажрибаси каби мезонлар бўйича адолатли баҳолаш муҳимлиги таъкидланди.

Натижада юқоридаги малака талаблари ва мезонларга тўлиқ мос келадиган ва танловнинг иккинчи босқичи — тест синовларига ўтган номзодлар рўйхати жорий йилнинг 17 август куни www.anticorruption.uz веб-сайти орқали очиқ эълон қилиниши тўғрисида қарор қабул қилинди.

Танлов босқичлари:
1. Ариза ва ҳужжатлар қабули;
2. Номзодларнинг аризаларини кўриб чиқиш ва баҳолаш;
3. Интеллектуал салоҳиятни баҳолаш бўйича тестдан ўтказиш;
4. Психологик тест ва психофизиологик кўрикдан ўтказиш;
5. Суҳбат ўтказиш.

⚠️ Эслатма: Танловда иштирок этиш учун тақдим этилган аризанинг комиссия томонидан кўриб чиқилмаслик ҳамда номзодни кейинги босқичга қўймаслик сабаблари ва асослари эълон қилинмайди.

Facebook | Telegram | anticorruption.uz

Афсуски, айрим мансабдор шахслар бугунги мураккаб (пандемия) шароитида давлат маблағларининг самарали сарфланиши нақадар муҳим эканлигини тўла англаб етмаяптилар. Ижтимоий тармоқларда қизғин муҳокама бўлаётган – қиммат нархлардаги хизмат автотранспортларини харид қилиш – бунга яққол мисол бўла олади.

Бундай ҳолларда давлат хизматчиларига “Ҳалоллик вакцинаси”ни норматив ҳужжатлар қабул қилиб, тегишли чекловларни қўллаш орқали сингдиришдан бошқа чора қолмаяпти.

“Давлат ҳокимияти ва бошқаруви органларида хизмат автотранспортларидан фойдаланиш тизимини тубдан такомиллаштириш чора-тадбирлари тўғрисида”ги Ўзбекистон Республикаси Президенти қарори лойиҳасида айнан мана шу каби ҳолатларнинг олдини олиш режалаштирилмоқда.

Лойиҳага кўра, Давлат ҳокимияти ва бошқаруви органлари раҳбар ходимларига хизмат авторанспортларни классига қараб бириктириш нормативлари (энг юқори нархлари) белгиланади.

Жумладан, туман, шаҳар ҳокимларига бириктириладиган хизмат автотранспорти нархи БҲМнинг 1200 баравари (267 млн. 600 минг сўм)дан ошмаслиги, давлат ҳокимияти ва бошқаруви органларининг Қорақалпоғистон Республикаси, вилоятлар, Тошкент шаҳар бўлинмалари раҳбарлари хизмат автомашинаси нархи эса БҲМнинг 700 баравари (156 млн. 100 минг сўм)дан ошмаслиги керак бўлади.

Давлат ташкилотларида фойдаланишда мавжуд бўлган хизмат авторанспортлари хатловдан ўтказилади ва белгиланган нормативлардан ортиқча бўлган хизмат автотранспортлари “E-IJRO AUKSION” орқали аукцион савдоларда сотилиши таъминланади.

Хизмат авторанспортларини сотишдан тушган маблағлар эса тегишлича республика бюджетига ва Қорақалпоғистон Республикаси бюджети, вилоятлар ва Тошкент шаҳар маҳаллий бюджетларига йўналтирилади.

Давлат ҳокимияти ва бошқаруви органларида хизмат автотранспортларини янгисига алмаштириш ундан камида 5 йил фойдаланилгандан сўнг амалга оширилади. Бунда автотранспортнинг теxник ҳолати, ундан фойдаланиш xавфсизлиги, шунингдек, янгисига алмаштиришнинг иқтисодий мақсади инобатга олиниши лозим бўлади.

Бундан ташқари, хизмат автотранспортларидан фақат хизмат мақсадларида фойдаланилиши жамоатчилик томонидан назорат қилинади ҳамда хизматдан ташқари мақсадларда фойдаланиш ҳолатлари аниқланганда, Ўзбекистон Республикаси Коррупцияга қарши курашиш агентлигининг махсус веб-порталига, шунингдек, махсус мобиль дастурий таъминотига фото ва видео материалларни жойлаштириш орқали хабардор қилинади.

Ўйлайманки, мазкур ҳужжатнинг қабул қилиниши бугунги кун учун жуда долзарб масалага айланган — бюджет маблағларининг мақсадли сарфланиши, унинг устидан жамоатчилик назоратининг ўрнатилишига хизмат қилади.

Барча ватандошларимизни Ўзбекистон Республикаси Конституцияси қабул қилинганлигининг 28 йиллиги билан самимий муборакбод этаман!

@aburxanov

Ўзбекистон. Президент. Йилнома-2020
—
Узбекистан. Президент. Хроника-2020

Prezident.uz|Facebook|Instagram|YouTube|Twitter

Коррупцияга қарши курашиш бўйича фуқароларнинг фикрлари

“Ижтимоий фикр” республика жамоатчилик фикрини ўрганиш маркази томонидан “Коррупцияга қарши курашиш тўғрисида жамоатчилик фикри” мавзусида жамоатчилик фикри сўрови ўтказилди.

Респондентлар томонидан билдирилган барча фикрлар эътиборга молик ва таҳлил қилиш учун хизмат қилади. Чунки, сўров давомида фуқаролардан коррупция тушунчаси, унга қарши курашиш бўйича Ўзбекистонда амалга оширилаётган ишларга муносабатлари каби 10дан ортиқ масалалар бўйича фикрлар ўрганилган.

Тадқиқот натижалари бирмунча катта, фақатгина баъзи муҳим жиҳатларга тўхталмоқчиман. Жумладан:
- фуқароларда коррупцияга қарши муросасизлик кайфияти шаклланмоқда, улар жамиятда коррупция мавжудлиги ҳақида анча дадил гапиришмоқда. Мисол учун, сўралганларнинг 83,2%и жамиятда коррупция мавжуд ва юрт тараққиётига таҳдид солади, дея фикр билдиришган.
- респондентларнинг 32,4%ининг фикрича, деярли ҳар иккинчи мансабдор шахс коррупцияга мубтало бўлган. Бу ёмон сигнал.

Фуқароларни пора беришга нима ундамоқда?
Аниқланишича, масалани қонун йўли билан ҳал этишдаги тўрачилик, сансалорлик, муаммони қонун йўли билан ҳал этишнинг иложи йўқлиги айрим фуқароларни мансабдор шахсни сотиб олишга ундайди.

Шунингдек, фуқаролар коррупцияга қарши курашишда қуйидаги чоралар энг самарали деб ҳисоблашмоқда:
- жиноий жавобгарлик ва жазо чораларини кучайтириш;
- тарбиявий ишларни кучайтириш, аҳолининг ҳуқуқий маданияти даражасини ошириш;
- иш ҳақи миқдорини ошириш;
- ОАВларида коррупцияга қарши курашишни ёритиш, коррупционерлар ва порахўрларни фош қилиш ва бошқалар.

Ўз навбатида, Агентлигимиз бугунги кунда коррупциянинг олдини олиш ва унга қарши самарали курашиш бўйича кўплаб таклифларни ишлаб чиқмоқда. Уларнинг асосий ғояси коррупциявий жиноятларга муросасиз бўлиш ҳисобланади.

Фаолиятимиз давомида ҳамда хориж тажрибасидан шуни кўряпмизки, бу соҳада жавобгарлик чорасини кескин кучайтириш лозим, деб ҳисоблаймиз. Амалдаги жазо чоралари етарли эмас. Шунингдек, коррупциявий жиноятларга қўл урган мансабдорларга нисбатан енгиллаштирувчи чораларни қўллаш амалиётини бекор қилиш лозим.

Бу каби сўровлар ва тадқиқотлар эса келгуси ориентирларни белгилаб олиш учун хизмат қилади.

@aburxanov

Коррупциявий жиноятларнинг содир этилишига асосан қандай омиллар сабаб бўлмоқда?

Коррупцияни минимум даражага туширишнинг энг самарали усули уни олдини олиш, яъни коррупциявий хатти-ҳаракатларни келтириб чиқарувчи омилларни бартараф этиш ҳисобланади.

Шу маънода 2020 йил давомида мансабдор шахслар томонидан содир этилган коррупциявий жиноятлар таҳлил қилинди. Хусусан, уларнинг содир этилишига қандай омиллар сабаб бўлаётгани ўрганилди. Асосий омиллар:

• моддий манфаатдорлик ёки шахсий бойлик орттиришга интилиш;
• иш фаолиятининг тўғри йўлга қўйилмаганлиги, соҳада бюрократик тўсиқларнинг мавжудлиги;
• ходимнинг ижтимоий таъминланмаганлиги;
• ишга қабул қилишда ходимнинг шахси лозим даражада ўрганилмаганлиги;
• мансаб ёки хизмат мажбуриятларини бажариш чоғида манфаатлар тўқнашувига йўл қўйганлиги;
• иш ҳажмининг тўғри тақсимланмаганлиги ва бошқалар.

Ушбу маълумотлар судлар томонидан 2020 йилда кўриб чиқилган коррупция билан боғлиқ жиноят ишлари таҳлили асосида тайёрланган.

@aburxanov

“Давлат органлари ва ташкилотларининг фаолияти очиқлигини таъминлаш, шунингдек, жамоатчилик назоратини самарали амалга оширишга доир қўшимча чора-тадбирлар тўғрисида”ги Президент фармони имзоланди.

Унга мувофиқ Коррупцияга қарши курашиш агентлигига қуйидаги қўшимча вазифалар юклатилди:
▪️давлат органлари ва ташкилотлари фаолиятининг очиқлигини таъминлашни мувофиқлаштириш ва доимий мониторинг қилиш;
▪️жисмоний ва юридик шахсларнинг мурожаатларидан келиб чиқувчи давлат органлари ва ташкилотларининг очиқлиги ва шаффофлигига оид долзарб масалаларни “Mening fikrim” веб-портали орқали умумхалқ муҳокамасига чиқариш;
▪️очиқ маълумотлар шаклида жойлаштирилиши керак бўлган ижтимоий аҳамиятга молик маълумотлар рўйхатини узлуксиз тўлдириш, такомиллаштириб бориш ва янгилаш бўйича таклифлар ишлаб чиқиш ҳамда уларни амалга оширишга кўмаклашиш;
▪️ОАВ орқали давлат органлари ва ташкилотлари хизматчиларига “давлат органлари фаолияти очиқлиги, шаффофлиги ва ҳисобдорлиги” маданиятини сингдириш ҳамда давлат органлари ва мансабдор шахслар халқ олдида ҳисобдорлигини таъминлаш муҳимлиги тўғрисида тушунтириш ишлари олиб борилишини ташкил этиш.

Бундан ташқари:
▪️Агентлик тузилмасида Давлат органлари ва ташкилотлари фаолияти очиқлигини таъминлаш бошқармаси ташкил этилади;
▪️Агентлик давлат органлари ва ташкилотларининг очиқликка оид қонунчилик ҳужжатларида кўрсатилган талабларни мунтазам равишда бузаётган айбдор мансабдор шахсларни жавобгарликка тортиш бўйича Ўзбекистон Республикаси Президенти Администрацияси ва Вазирлар Маҳкамасига таклифлар киритиб боради;

2021 йил 1 июлдан бошлаб расмий веб-сайтда ва Очиқ маълумотлар порталида қуйидаги маълумотлар жойлаштирилади:
– мансабдор шахсларнинг хизмат сафарлари ва хориждан ташриф буюрган меҳмонларни кутиб олиш харажатлари;
– Президент, Вазирлар Маҳкамаси ҳужжатлари билан берилган солиқ ва божхона имтиёзлари ҳамда преференциялар;
– ўзларининг йиллик харажатлар сметаси ва унинг ижроси, шу жумладан, объектларни қуриш, реконструкция қилиш ва капитал таъмирлаш ишлари, автомототранспорт воситаларини сотиб олиш харажатлари.

Шунингдек:
• ОТМларнинг бакалавриат таълим йўналишларига кириш учун тест ва ижодий имтиҳонлар;
• магистратура босқичига қабул имтиҳонлари;
• республикадаги ёки хориждаги ОТМдан республикадаги давлат ОТМга ўқишни кўчириш истагини билдирган талабалардан олинадиган имтиҳонлар;
• хорижий таълим тўғрисидаги ҳужжатларни тан олишда талабгорлардан олинадиган тест синовлари жараёни Интернет тармоғида жонли эфирга узатилади.

2021 йил 1 декабрдан Олий Мажлис Қонунчилик палатаси ва Сенати мажлислари, Қорақалпоғистон Республикаси Жўқорғи Кенгеси, халқ депутатлари вилоят, туман, шаҳар Кенгаши сессиялари телеканаллар, Интернет тармоғи орқали жонли эфирга узатилади.

Ҳар йил якунлари бўйича давлат органлари ва ташкилотларининг Очиқлик индекси аниқланади.

Шунингдек, “Давлат сирларини сақлаш тўғрисида”ги қонун лойиҳаси ишлаб чиқилади.

@aburxanov

“Коррупцияга қарши муросасиз муносабатда бўлиш муҳитини яратиш, давлат ва жамият бошқарувида коррупциявий омилларни кескин камайтириш ва бунда жамоатчилик иштирокини кенгайтириш чора-тадбирлари тўғрисида”ги Президент Фармони ва “Коррупцияга қарши курашиш фаолиятини самарали ташкил этишга доир қўшимча чора-тадбирлар тўғрисида”ги Президент қарори лойиҳалари муҳокамага қўйилди.

Лойиҳаларда қуйидагилар назарда тутилмоқда:

▪️ Агентлик томонидан “Коррупцияга оид жиноятларни содир этишда айбдор деб топилган шахсларнинг очиқ электрон реестри” ни юритиш.
Реестрга киритилган шахсларга давлат хизматига қабул қилиш ва давлат мукофотлари билан тақдирлаш, cайланадиган ва алоҳида тартибда тайинланадиган лавозимларга номзодларини кўрсатиш, давлат активларини хусусийлаштириш билан боғлиқ
тендер ва танлов савдоларида иштирок этиши, давлат улуши 50 фоиздан юқори бўлган ташкилотлар ҳамда давлат таълим муассасаларида раҳбарлик лавозимларида фаолият юритишини тақиқлаш;
▪️давлат идоралари ва ташкилотларига ишга қабул қилишни очиқ танлов асосида амалга ошириш тартибини жорий этиш;
▪️давлат органлари ва ташкилотларининг мансабдор шахслари ва ходимларига тадбиркорлик фаолияти билан шуғулланишни қатъиян тақиқлаш;
▪️барча давлат органлари ва ташкилотлари, шу жумладан вилоятлар ва Тошкент шаҳар ҳокимликларида коррупцияга қарши ички назорат тузилмалари фаолиятини йўлга қўйиш ва бу тузилмалар раҳбарлари Агентлик билан биргаликда ўтказиладиган очиқ танлов асосида ишга қабул қилиниши, уларни лавозимидан озод этиш масаласи Агентлик билан келишилиши;
▪️Агентлик томонидан барча давлат органлари ва ташкилотлари, шу жумладан ҳокимликларда йўлга қўйилган коррупцияга қарши курашиш ишларининг самарадорлигини баҳоловчи рейтингни эълон қилиш;
▪️2022 йил 1 январдан бошлаб, давлат хизматчилари, уларнинг турмуш ўртоғи ва вояга етмаган фарзандларининг даромадлари ва мол-мулкини мажбурий декларация қилиш тизимини жорий этиш;
▪️давлат хизматчиси томонидан декларацияни тақдим этишдан бош тортиш ва қасддан нотўғри маълумотларни киритиш уни давлат хизматидан четлаштиришга ва қонунда белгиланган жавобгарликка тортишга асос бўлиши;
▪️давлат хизматчиларига республика ҳудудидан ташқарида ҳисобрақамлар очиш ва эгалик қилиш, нақд пул маблағларини сақлаш, кўчмас ва бошқа мол-мулкка эга бўлишни тақиқлаш;
▪️давлат хизматчиларини мунтазам равишда коррупцияга қарши курашиш, манфаатлар тўқнашуви ва одоб-ахлоқ қоидалари бўйича махсус ўқув курсларида ўқитиш;
▪️“Манфаатлар тўқнашувини тартибга солиш тўғрисида”ги қонун, шунингдек, давлат харидлари, солиқ имтиёзлари, ер ажратиш, давлат активларини хусусийлаштириш соҳаларида манфаатлар тўқнашувига йўл қўйганлик учун жавобгарликни назарда тутувчи қонун лойиҳаларини ишлаб чиқиш;
▪️Агентликка манфаатлар тўқнашуви билан боғлиқ ҳар қандай ҳолатлар аниқланганда, шартнома, буйруқ ва бошқа ҳужжатларни тўхтатиш тўғрисида тақдимнома ёки уни ҳақиқий эмас деб топиш бўйича судга даъво киритиш ваколатини бериш;
▪️Жиноят кодексида коррупцияга оид жиноятлар тоифасига
кирувчи моддаларнинг аниқ рўйхатини белгилаш;
▪️коррупцияга оид жиноятлар учун белгиланган жазо чораларини узоқ муддатли озодликдан маҳрум қилиш жазо чорасигача кескин кучайтириш;
даромадлар ва мол-мулкни декларациялаш жараёнида аниқланган ноқонуний бойлик орттирганлик учун жавобгарлик ўрнатиш;
▪️коррупцияга оид жиноятларни содир этган шахсларга нисбатан енгиллаштирувчи жазо чоралари қўлланилишига чекловлар белгилаш;
▪️давлат харидларида тўғридан-тўғри шартномалар тузишни назарда тутувчи қонун ҳужжатларини ишлаб чиқиш бўйича ташаббус билан чиқишни қатъиян тақиқлаш ва бошқалар.

Давлатимиз раҳбарининг ташаббуси билан ишлаб чиқилган ушбу ҳужжатлар ҳақиқатдан ҳам тарихий аҳамиятга эга бўлиб, шубҳасиз мамлакатимизда коррупцияга қарши муросасиз муҳит яратиш, давлат ва жамият бошқарувида коррупциявий омилларни кескин камайтириш, ушбу жараёнга кенг жамоатчиликни сафарбар этишга имкон яратади.

Лойиҳалар халқаро стандартлар, шунингдек, МДҲ давлатлари, АҚШ, Буюк Британия, Германия, Франция, Япония каби мамлакатлар тажрибаси асосида ишлаб чиқилди.

@aburxanov