Саха Өрөспүүбүлүкэтин күнүн көрсө биир дойдулаахпыт, Саха автономиятын төрүттэспит биллэр бэлитиичэскэй диэйэтэл, улуу убайбыт Исидор Барахов төрөөбүт дойдутугар Харбалаах нэһилиэгэр үөрүүлээх миитин тэрилиннэ.

Тэрээһиҥҥэ Саха Өрөспүүбүлүкэтин бырабыыталыстыбатын бастакы солбуйааччыта, биир дойдулаахпыт Джулустан Анатольевич Борисов Үөһээ Бүлүү дьонун-сэргэтин, мустубут Харбалаах нэһилиэгин олохтоохторун Өрөспүүбүлүкэ күнүнэн эҕэрдэлээтэ, Ил Дархан Айсен Николаев махтал суруктарын туттарда.

Исидор Барахов бүтүн Саха Сирэ, кэлэр кэскилэ, ыччата сайдар суолун арыйбыт, саха көҥүлүн олохтоспут умнуллубат өҥөлөөх.

Биир дойдулаахтара кини чулуу аатын умнубакка, үйэттэн үйэҕэ ааттата, сырдата турар ытык эбээһинэспит. Ол курдук, сотору кэминэн Исидор Барахов аатын сүгэр Саха Өрөспүүбүлүкэтин судаарыстыбыннаһын түмэлэ тутуута бүтэн үлэҕэ киирэрин бары долгуйа кэтэһэбит.

Күндү Үөһээ Бүлүү улууһун олохтоохторо! Кэлэн иһэр бырааһынньыгынан, Өрөспүүбүлүкэбит төрүттэммитэ 102 сылынан итиитик-истиҥник эҕэрдэлиибин! Саха Сирэ, Үөһээ Бүлүү сайда чэчирии турдун!

#ИсидорБарахов
#ҮөһээБүлүү
#ДеньРеспубликиСахаЯкутия

t.iss.one/ValeriNikolaev

Харбалаах орто оскуолатын үөрэнээччилэрин оҥоһуга. Исидор Барахов, Максим Аммосов, Платон Ойуунускай.

#ҮөһээБүлүү

t.iss.one/ValeriNikolaev

Үөһээ Бүлүү волонтёра Васма Васильевна салайар "Дойдум тыына" иистэнэр хоско анал байыаннай дьайыыга сылдьар уолаттарбытыгар анаан плащ-палаткалар, суумкалар тигиллиилэрин Джулустан Анатольевиһы кытта көрдүбүт.

Ыам ыйыгар улуус салалтата биир дойдулаах уолаттарбытын анал байыаннай дьайыы сиригэр баран көрсөрбүт былааннанар. Бастакы сырыыбытыгар "Дойдум тыына" волонтерскай хамсааһын тикпит суумкаларын, плащ-палааткаларын уонна бэлэмнээбит харысхалларын илдьэ баран уолаттарбытыгар тиксэриэхпит.

Васма Васильевна тигиллибит плащ-палаткалары тепловизорга көстүбэт гына ис өттүн фольганнан тигэри толкуйдуурун кэпсээтэ.

Иис үлэтэ күн ахсын күөстүү оргуйар, эдьиийдэрбит сылаас илиилэринэн тикпит алгыстаах баһыылкалара уолаттарбытыгар харысхал, көмө буоллуннар.

#ҮөһээБүлүү
#Волонтеры

t.iss.one/ValeriNikolaev

Ытыктабыллаах Үөһээ Бүлүүм дьоно-сэргэтэ!

“Үөһээ Бүлүү улууһа (оройуона)” муниципальнай оройуон дьаһалтатын аатыттан бука барыгытын Саха өрөспүүбүлэкэтин күнүнэн итиитик-истиҥник эҕэрдэлиибин!

Муус устар 27 күнэ Саха Сирин кэм кэрдииһигэр ураты суолталаах күн буолар. Үйэ аннараа өттүгэр, 1922 сыллаахха Саха Сирэ бэйэтин салайынар көҥүлэ төрүттэммитэ. Онтон 1992 сыллаахха муус устар 27 күнүгэр Сахабыт сирэ бэйэтин интэриэһин, быраабын туһунан сүрүн сокуона – Конституция ылыллыбыта.

Бу саха норуотугар сүҥкэн суолталаах түгэннэр биһиги өрөспүүбүлэкэбит сайдыыта саҥа үктэлгэ тахсарыгар, туруга бөҕөргүүрүгэр сүрүн төрүөт буолбута.

Саха норуотун инники дьылҕатын өтө көрөн, Автономияны олохтуур төрүт суолталааҕын өйдөөн турууласпыт сүдү кылааттаах биһиги биир дойдулаахпыт, улуу убайбыт Исидор Барахов. Кини, доҕотторун, үөлээннээхтэрин Платон Ойуунускайы, Максим Аммосовы, Степан Аржакову, Степан Васильевы кытта эдэр саастарыгар Саха Сирин көҥүлүн төрүттүүрү күүскэ көтөҕөн, туруорсан, Үрдүкү Салалтаттан өйөбүл ылан, Саха сиригэр бастакы Быраабытылыстыба тэриллибитэ.

Сыллата муус устар 27 күнүгэр Саха Өрөспүүбүлүкэтин өрөгөйүн бэлиэтиибит. Бу күн биһигини – Саха сирин олохтоохторун бииргэ түмэр күммүт буолар.

Бу бэлиэ күнү биһиги бигэтик өйдүөххэ, киэҥ туттуохха уонна кэнчээри ыччаппытын патриотическай тыыҥҥа сөптөөхтүк иитиэххэ диэн ыҥырабын. Улуу убайдарбыт курдук инникигэ дьулуурдаах, саҥаттан саҥаны айа-тута, оҥоро сылдьыаҕыҥ, республикабыт уонна улууспут кэлэр кэскилин, сайдыытын туһугар биир санаанан салайтаран үүнүөҕүҥ-сайдыаҕыҥ!

Убаастабыллаах Үөһээ Бүлүү улууһун олохтоохторо уонна ыалдьыттара!

Төрөөбүт дойдубут өссө да тупсарын, чэлгийэ сайдарын туһугар түмсэммит күүскэ үлэлиэҕиҥ! Эһигини кытта үөрүү, ил-эйэ эҥэрдэстин, чөл олох, дьол-соргу олохсуйдун!


Эҕэрдэни кытта Үөһээ Бүлүү улууһун баһылыга Валерий Николаев.

#ДеньРеспубликиСахаЯкутия
#ӨрөспүүбүлүкэКүнэ
#ҮөһээБүлүү

t.iss.one/ValeriNikolaev

Саха Өрөспүүбүлүкэтин күнүнэн Өрөгөй ырыатын ыллыыллар Үөһээ Бүлүү улууһун баһылыга Валерий Валерьевич Николаев, улуус баһылыгын бастакы солбуйааччыта Егор Дмитриевич Иванов, улуус баһылыгын социальнай боппуруостарга солбуйааччы Анна Михайловна Уларова, улуус баһылыгын дьаһалта дьыалатыгар солбуйааччы Михаил Михайлович Егоров, улуус депутаттарын сэбиэтин бэрэсэдээтэлэ Николай Николаевич Николаев, дьаһалта үлэһиттэрэ уонна тэрилтэ салайааччылара.

#өрөгөй_ырыатын_ыллыыбыт
#ҮөһээБүлүү