Bugun respublikamiz bo‘ylab Prezident maktablariga kirish imtihoni jarayonlari boshlandi. Joriy o‘quv yilida Prezident maktablariga jami 56 745 nafar o‘quvchi hujjat topshirgan.
Aytish joizki, mamlakatimizda iqtidorli bolalarni taʼlim jarayonida ilg‘or texnologiyalarni qo‘llagan holda o‘qitish va rag‘batlantirish maqsadida tashkil etilgan Prezident maktablarida farzandlarimizni o‘qish istagi yildan-yilga ortib borayotgani quvonarli hol. Sababi, boshlang‘ich sinfdan taʼlim cho‘qqilarini zabt etish yo‘lida tashlangan bu qadam yuqori sinfgacha bolani ham, ota-onani ham tark etmaydi. 

Ayni damda Prezident maktablariga kirish imtihonlarini yuqori saviyada tashkil etish uchun viloyat hokimliklari, Ichki ishlar vazirligi, Milliy gvardiya, Tez tibbiy yordam, Xavfsiz shahar markazi hamda Bilim va malakalarni baholash agentligi bilan hamkorlikda tayyorgarlik ishlari yuqori saviyada amalga oshirilgan, deb ayta olaman.

Yuksak marralarni ko‘zlab, imtihonlarda qatnashayotgan barcha bolajonlarimizga omad va zafarlar yor bo‘lishini chin yurakdan tilab qolaman. Bugun ilm egallash yo‘lida qo‘yilgan qadamlaringiz umringiz davomida sizni tark etmasligiga ishonaman.

Ijtimoiy tarmoqlarda tarqalayotgan savollar yuzasidan rasmiy munosabat

Xabaringiz bor, 15-iyul kuni barcha Prezident maktablariga kirish imtihonlarining birinchi bosqichi 3 smenada bo‘lib o‘tdi.

Turli ijtimoiy tarmoqlarning "1-smena savollari 2- va 3-smenada ham takrorlangan" deya, xavotir bilan bildirayotgan fikr-mulohazalari asossiz.

Hurmatli ota-onalar, shuni ma’lum qilamizki, barcha imtihon savollari har yilgidek Cambridge Assessment International Education xalqaro tashkiloti tomonidan O‘zbekistondagi umumta’lim maktablarida qo‘llaniladigan o‘quv dasturlari asosida tayyorlandi.

Talabgorlar sonidan kelib chiqib mazkur birinchi bosqich imtihonlari 3 smenada 3 xil variantda tashkil qilingan. Cambridge Assessment International Education xalqaro tashkiloti har yili imtihon savollarini zaxirasi bilan taqdim etadi.

Agar talabgorlar soni bundan ham ko‘p bo‘lib, yanada ko‘proq smenada tashkil qilganida ham shuncha smenaga mos har xil variantlar taqdim etilgan bo‘lardi. Bir smenada berilgan savollar keyingi smenalarda aynan qo‘llanilmaydi.

Eslatib o‘tamiz, Prezident maktablariga kirish imtihonlarining birinchi bosqichi saralash bosqichi hisoblanib, udan muvaffaqiyatli o‘tgan 480 nafar o‘quvchi Respublika bo‘yicha bir vaqtda va 1 smenada bo‘lib o‘tadigan ikkinchi asosiy bosqich imtihonlarida o‘z bilimlarini sinovdan o‘tkazib ko‘radilar.

Agentlikning rasmiy sahifalariga ulanish:
Telegram | Facebook | Instagram | YouTube