Mahalla tizimi xodimlari tantanali ravishda taqdirlandi

Toshkent shahar hokimligida mamlakatimizda o‘zini o‘zi boshqarish organlari faoliyatini yangi bosqichga ko‘tarish, jamiyatimizda mahallaning o‘rni va nufuzini yanada yuksaltirish, inson qadrini ulug‘lashga qaratilgan keng ko‘lamli islohotlarni amalga oshirish, mahallabay ishlash tizimini samarali yo‘lga qo‘yish borasidagi katta xizmatlari, ko‘p asrlik an’analarimizni asrab-avaylash, xalqimiz orasida do‘stlik va hamjihatlik muhitini mustahkamlash, oila institutini har tomonlama qo‘llab-quvvatlash, sog‘lom turmush tarzini targ‘ib etish, yosh avlodni ona Vatanga muhabbat va sadoqat, milliy va umumbashariy qadriyatlarga hurmat ruhida tarbiyalash ishlariga qo‘shgan munosib hissa qo‘shgan bir guruh mahalla faollarining mehnati e’tirof etildi.

Xususan, tegishli Prezident farmoniga muvofiq, Toshkent shahar hokimi v.b. Shavkat Umurzakov tomonidan Uchtepa tumanidagi «Uchtepa» mahalla fuqarolar yig‘ini raisi M. Ilhomovga «Do‘stlik» ordeni, Yunusobod tumanidagi «Minor» mahalla fuqarolar yig‘ini xotin-qizlar faoli M. Mirzayevaga II darajali «Sog‘lom avlod uchun» ordeni hamda Olmazor tumanidagi «Elparvar» mahalla fuqarolar yig‘ini raisining keksalar masalalari bo‘yicha maslahatchisi T. Latipovga «Shuhrat» medali topshirildi.

Bundan tashqari, shahrimiz mahallalarida faoliyat yurituvchi 11 nafar mahalla raislari hamda Yashnobod tuman Nuroniylar jamg‘armasining raisi «Mahalla iftixori» ko‘krak nishoni bilan munosib ravishda taqdirlandilar.