Filialda súmelek seyili bolıp ótti

Milliy qádiriyatlarımızdı ózinde sáwlelendirgen ájayip Nawrız áyyamı qarsańında Respublikamızdıń barlıq orınlarında «Súmelek seyili» ótkeriledi. Samarqand mámleketlik veterinariya medicinası, sharwashılıq hám biotexnologiyalar universiteti Nókis filialında da kúni keshe Súmelek seyili ilajı bolıp ótti. Onda pútkil filial jámááti awızbirshilikte, súmelek pisirip, qazan basında jıynalıp, ózleriniń bayram tileklerin bildirdi. — Nawrız bayramı xalqımızdıń ıntıqlıq hám ózgeshe saǵınısh penen kútip alatuǵın áyyamı esaplanadı. Bul bayramdı súmelek taǵamısız kóz aldımızǵa keltire almaymız. Búgin filialdıń ǵarrısı-jası jıynalıp, bereketli qazan basında súmelek pisirip, iygilikli tileklerin bildirdi. Bársheniń kewlinde bayram keypiyatı payda boldı —deydi direktor Adilbay Esimbetov. Ilaj dawamında «Qarekeńshe onlayn» komandasınıń qız-jigitleri qatnasıwında milliy ayaq-oyınlar hám qosıqlar atqarılıp, bárshege zawıq baǵıshlandı. Búgin erte tańda súmelek piskende bastırılǵan qazan qaqpaǵı ashılıp, miynet veteranı, jası úlken aǵamız, awıl xojalıǵı ilimleri kandidatı, docent Buxarbay aǵa Abdirovtıń pátiyası alındı. Súmelek ústinde payda bolǵan súwretke qusaǵan kórinislerdi jaqsılıqqa jorıw úrdiske aylanǵan. Filial jámáátiniń awızbirshilikte pisirilgen súmeleginde bolsa, quyash hám tolqınlardı megzetetuǵın kórinisler payda boldı. Bárshe birgelikte súmelek taǵamınan dám tattı.

Málimleme xızmeti
👉Rásmiy telegram kanalımızǵa aǵza bolıń