📌 Professor Tae: O‘zbek tili meni o‘ziga maftun etgan

Ona tilimizga davlat maqomi berilganligining 35 yilligi hamda O‘zbek tili bayrami kuni munosabati bilan ilmiy-adabiy anjuman o‘tkazildi. Unda Samarqand davlat chet tillar universiteti hamda Samarqand xalqaro texnologiyalar universiteti professorlari, xorijiy tilshunos olimlar, ijodkorlar, tuman ziyolilalari qatnashdi.

O‘zbekistonda xizmat ko‘rsatgan madaniyat xodimi, “El-yurt hurmati” ordeni sohibasi Xosiyat Bobomurodova so‘zga chiqib, milliy qadriyatlarning shakllanishida ona tilining ahamiyati yuksak ekanini ta’kidladi. Bu borada mamlakatimizda amalga oshirilayotgan ishlar, yutuq va kamchiliklarni qayd etdi.

Shuningdek, professor Jozef Stark (AQSH) va Kim In Tae (Janubiy Koreya) o‘zbek tilining boy imkoniyatlari, jozibadorligi haqida fikr-mulohazalarini bildirishdi.

– Sharq tillari orasida o‘zbek tili so‘z boyligining ko‘lami, jilvasi, so‘zlovchiga qulayligi va mukammal tuzilishi bilan ajralib turadi, – deydi professor Kim In. – Shu jihat meni o‘ziga maftun etgan, umrimning 10 yildan ortiq davrini o‘zbek tilini o‘rganishga sarfladim. Bu umrim mazmuniga aylangan, desam mubolag‘a emas.

Tadbir so‘ngida ma’naviy-ma’rifiy sohalardagi hamkorligi uchun professor-ustozlarga tashakkurnoma va esdalik sovg‘alari taqdim etildi.

Shuningdek, bayram arafasida o‘tkazilgan insholar hamda hokim stipendiyasi tanlovlarida g‘olib bo‘lgan o‘quvchilar taqdirlandi.

Ulaning va ulashing:
Veb-sayt | Facebook | Telegram | Instagram