От жара кеселлигинен сақланайық!

От жара кеселлиги өткир жуқпалы кеселлик болып, кеселлик ҳайўанлардан адамға жуғыўы мүмкин.
Кеселлик адамларға кесел ҳайўанлар бағылғанда, кеселленген ҳайўанлардан алынған тери яки тери жүнлерине қайта ислеў берилгенде, олардан алынған сүт ҳәм гөш өнимлерин пайдаланылғанда, ветеринария қәнигеси рухсатысыз ҳайўанларды сойғанда, ветеринария көригинен өтпеген шарўашылық өнимлерин пайдаланыў ақыбетинде жуғады.
Кеселлик инфекциясы адам организмине дем алыў жоллары, тери ҳәм аўыз арқалы жуғыўы мүмкин. От жара кеселлиги адам организминдеги өкпеге, ишекке, териге зыян жеткизеди ҳәм инфекция - қанға өтип тарқалатуғын септик түрлери ушырайды. Кеселлик белгилери териге түскен от жара таяқшасы дәслеп терини қышытып қызарыў пайда етеди. Дақ қаттыласады, бир неше саат ишинде исинген жара пайда етеди. Ең усы кеселликке тән болған белги - бул жараларда аўырыў болмайды. Жара пайда болыўы менен дене температурасы көтериледи, ети үйиседи, басы айланады, кеўли айныйды, ҳәлсизленеди. Кеселлик ҳайўанлардағы белгилери ҳайўан бирден жығылады, аўзы ҳәм мурнынан қан аралас суйықлық ажралады ҳәм ҳайўан набыт болады. Кеселлик тийкарынан қарамаллар, қой ҳәм ешкилер, ат, ешек ҳәм түйелерде пайда болады.
Кеселликтиң жаман тәрепи шыпакерге жолықпаса, бул жағдай өлим менен байланыслы болған айрықша жағдайларға алып келеди. Сонлықтан от жара кеселлигинен сақланыў ушын төмендеги қәўипсизлик қағыйдаларына қатаӊ әмел етиӊ:
-өзиӊизге тийисли болған үй ҳайўанларын ветеринария бөлимине есапқа қойыӊ, есапқа қойыў нәтийжесинде бул ҳайўанлардыӊ от жара кеселлигине қарсы нәтийжели вакциналар менен өз ўақтында емлениўине себеп болады;
- ҳайўанларда ҳәр қандай кеселлик белгилерин сезсеӊиз тезлик пенен ветеринария қәнигесине хабар (61.465-54-30) бериӊ, кеселликти өзиӊиз анықлаўға яки емлеўге умытылмаӊ;
-гөшт, сүт өнимлерин тек ғана арнаўлы белгиленген орынлар есапланған гөш дүкәнлары, дийхан базарындағы павильонлардан сатып алыӊ, гөш өнимлерин сатыўшысынан ветеринария мағлыўматнамасын талап етиӊ;
-жеке гигиена қағыйдаларына қатаӊ әмел етиӊ.

Қараөзек районы Айрықша жағдайлар бөлими.

➡️@QaraozekHakimligi