#Xızmet_saparı

Qaraqalpaqstan Respublikası delegaciyası aǵzaları Tatarstanda óndirislik orınlarınıń jumısları menen tanıstı

Qaraqalpaqstan Respublikası Ministrler Keńesi Baslıǵınıń orınbasarı Bayrambay Otemuratov hám Qaraqalpaqstan Respublikası Joqarı bilimlendiriw, ilim hám innovaciyalar ministri Batırbek Qayıpbergenov basshılıǵındaǵı joqarı oqıw orınları basshılarınan ibarat delegaciya aǵzaları ámeliy sapar sheńberinde Rossiya Federaciyası Tatarstan Respublikasında bolıp turıptı.

Delegaciya aǵzaları sapar sheńberinde Elabuga rayonında jaylasqan sanaat óndirisi tipindegi «Alabuga» arnawlı ekonomikalıq zonasına barıp, ol jerdegi sharayatlar, ásirese, oqıw hám ámeliyat procesin birgelikte jolǵa qoyıw baǵdarında ámelge asırılıp atırǵan jumıslar menen tanıstı.

Arnawlı ekonomikalıq zonada jılına eń joqarı tájiriybege iye bolǵan 10 mıń jumısshı tayarlap shıǵaratuǵın, óndirislik robototexnika, ximiyalıq laboratoriyalıq analiz, BIM-joybarlaw, elektrotexnika, mikroelektronika, xalıqaralıq pedagogika, yurisprudenciya hám usı sıyaqlı 20 ǵa shamalas baǵdarlar boyınsha jaslardıń bilim hám ámeliy kónlikpelerin jetilistiriwge, sonıń menen birge, óz joybarların ámelge asırıwǵa baǵdarlanǵan «Alabuga International School», «Alabuga Politex» xalıqaralıq bilimlendiriw oraylarınıń jumısları delegaciya aǵzalarında úlken qızıǵıwshılıq oyattı.

Ámeliy sapardan gózlengen tiykarǵı maqset Qaraqalpaqstan Respublikasındaǵı joqarı oqıw orınları menen xalıqaralıq birge islesiw jumısların jetilistiriw hám jańa baǵdarlar boyınsha nátiyjeli eki tárepleme baylanıslar ornatıwdan ibarat.


Tolıq maǵlıwmat

Biziń betlerimiz: || Bizning sahifalarimiz:
Telegram | Instagram | Facebook | X

#Xızmet_saparı

Tatarstandaǵı ilimiy oraylar hám joqarı oqıw orınları menen nátiyjeli birge islesiw dawam etedi

Aldın xabar bergenimizdey, Qaraqalpaqstan Respublikası Ministrler Keńesi Baslıǵınıń orınbasarı Bayrambay Otemuratov hám Qaraqalpaqstan Respublikası Joqarı bilimlendiriw, ilim hám innovaciyalar ministri Batırbek Qayıpbergenov basshılıǵındaǵı joqarı oqıw orınları basshılarınan ibarat delegaciya aǵzaları ámeliy sapar sheńberinde Rossiya Federaciyası Tatarstan Respublikasında bolıp turıptı.

Sapar baǵdarlamasına muwapıq, delegaciya aǵzaları Tatarstan Respublikası Bilimlendiriw hám ilim ministrligi, Tatarstan Respublikası Ilimler Akademiyası, sonıń menen birge, Qazan federal universitetinde boldı.

Ushırasıwlar barısında sońǵı jıllarda Rossiya hám Ózbekstan arasında sawda-ekonomikalıq hám mádeniy-gumanitar baǵdarlar qatarında ilim-bilimlendiriw tarawında da eki tárepleme birge islesiwdiń nátiyjeli jolǵa qoyılǵanlıǵı atap ótildi.

Ámeliy sapar sheńberinde ótkerilgen ushırasıwlar nátiyjesinde Tatarstan Respublikası Ilimler Akademiyası A.X.Xalikov atındaǵı Arxeologiya institutı hám Ájiniyaz atındaǵı Nókis mámleketlik pedagogikalıq institutı tárepinen usı jıldıń sentyabr ayında Qaraqalpaqstan Respublikası aymaǵındaǵı tariyxıy orınlarda professor-oqıtıwshılar hám student-jaslar qatnasıwında xalıqaralıq arxeologiyalıq ekspediciya shólkemlestiriw boyınsha kelisimge erisildi.

Tatarstan Respublikası Bilimlendiriw hám ilim ministrligi juwapkerleri menen ótkerilgen sáwbetlesiwler dawamında institutqa qaraslı texnikumlardıń jumısların jetilistiriw maqsetinde akademiyalıq mobillik tiykarında tájiriybe almasıwdı jolǵa qoyıw boyınsha aldaǵı ilajlar kelisip alındı.

Sonday-aq, Qazan federal universiteti basshıları menen bolǵan ushırasıwda eki joqarı oqıw ornı arasında dúzilgen shártnama tiykarında pedagogika hám psixologiya baǵdarlarında birge islesiw jumısların bunnan bılay da keńeytiw, professor-oqıtıwshılar, doktorantlar, magistrantlar hám studentlerdi akademiyalıq mobillik tiykarında almasıw hám qánigeligin arttırıw boyınsha baǵdarlamalardı nátiyjeli jolǵa qoyıw, birgelikte ilimiy konferenciyalar shólkemlestiriw boyınsha ámelge asırılatuǵın jumıslar belgilep alındı.


Biziń betlerimiz: || Bizning sahifalarimiz:
Telegram | Instagram | Facebook | X

ТаР ИА ҳәм ӨзР ИА Қарақалпақстан бөлими арасында илим ҳәм жаңа технологияларды раўажландырыў бойынша меморандум дүзилди.

Татарстан Республикасы Илимлер академиясында Қарақалпақстан Республикасы Министрлер Кеңеси Баслығының орынбасары Б.Өтемуратов басшылығындағы делегация ағзалары менен рәсмий ушырасыў болып өтти. Ушырасыўды дәслеп Илимлер академиясы Президенти Рифкат Миннихонов қутлықлаў сөзи менен ашып берди ҳәм делегация ағзаларына Татарстан Республикасы Илимлер академиясының тийкарғы искерлиги ҳаққында қысқаша таныстырып өтти.

Буннан соң, Татарстан Республикасы Илимлер академиясы институтлары директорлары ҳәм бөлим баслықлары делегация алдында өз бөлимлери ҳаққында қысқаша мағлыўмат берип сондай-ақ, бир қатар перспективалы илимий жойбарлар менен таныстырды. Соныда атап өтиў керек, Татарстан Республикасы Илимлер академиясының илимий орайлары бугинги күнде Қарақалпақстан Республикасының бир қатар илимий шөлкемлери ҳәм жоқары оқыў орынлары менен өз-ара бирге ислесип келмекте.

Ушырасыў даўамында Өзбекстан Республикасы Илимлер академиясы Қарақалпақстан бөлими баслығы, Қарақалпақ мәмлекетлик университети ректоры А.Реймов ҳәм Татарстан Республикасы Илимлер академиясы Президенти Р.Миннихоновлар биргеликте Өзбекстан Республикасы Илимлер академиясы Қарақалпақстан бөлими ҳәм Татарстан Республикасы Илимлер академиясы сондай-ақ, Қарақалпақ мәмлекетлик университети арасында бирге ислесиў меморандумын дүзди.

Меморандумнан гөзленген баслы мақсет илим ҳәм жаңа технологияларды раўажландырыў сондай-ақ, билимлендириў тараўларында илимий жойбарларды әмелиятқа енгизиў болып табылады.