Assalomu alaykum,
Muhtarama onaxonlar!
Munis opa-singillar!
Lobar va dilbar o‘quvchi qizlarimiz!

So‘zimiz avvalida, Siz azizlarni bahorning ilk bayrami bo‘lmish – 8 mart “Nafosat va go‘zallik” ayyomi bilan Ixtisoslashtirilgan ta’lim muassasalari agentligi nomidan chin ko‘ngildan qutlaymiz.

Sizlarga eng sara va samimiy, eng ezgu va yorug‘ tilaklarimizni izhor etib, qalbingizdagi jamiki istaklaringiz ro‘yobga chiqishini, hamisha hurmat va ehtiromda bo‘lishingizni so‘rab, o‘ylaganingizdan ortig‘i, kutganingizdan ziyodasi nasib etsin, deymiz.

Davlatimiz rahbari ta’kidlaganlaridek, inson hayoti va jamiyat rivojida muqaddas Ona zoti, munis ayollarimizning beqiyos o‘rnini oddiy so‘zlar bilan ifoda etish nihoyatda qiyin vazifa.

Mana shunday qutlug‘ kunlarda, O‘zbekiston Respublikasi Prezidentining “Zulfiya nomidagi Davlat mukofoti bilan taqdirlash to‘g‘risida”gi qarori imzolandi.
          
Qarorga ko‘ra, taqdirlangan 28 nafar nomzodlardan 8 nafari o‘quvchilar bo‘lib, ular orasida Prezident va Ijod maktablarida tahsil olayotgan qizlarimizning borligi kishini quvontiradi.

Agentlik tizimidagi maktablarda faoliyat yuritayotgan, o‘g‘il-qizlarimizga ustozlik qilib, g‘amxo‘rlik ko‘rsatayotgan 6611 nafar o‘qituvchilarning 3142 nafari yoki 47,5 foizini xotin-qizlarimiz tashkil etishini alohida mamnuniyat bilan aytmoqchimiz.

Qolaversa, Prezident maktablari, Ixtisoslashtirilgan maktablar va Ijod maktablarida ta’lim-tarbiya olayotgan o‘quvchilarimiz (oddiy sinflar qo‘shilmaganda) 61975 nafar  bo‘lsa, ularning 27227 nafari ya’ni 44 foizini qizlar tashkil etishini ta’kidlash joiz, deb o‘ylaymiz.

Buyuk davlat arbobi Indira Gandining shunday gapi bor: Bitta qiz bolani o‘qitsangiz, butun oilani o‘qitgan bo‘lasiz. Bu so‘zlar bejiz aytilmagan, albatta.
          
Aziz opa-singillar!

Yana bir bor sizlarni bayramingiz bilan samimiy muborakbod etib, Sizlarga sog‘lik-salomatlik, baxtu saodat, xonadonlaringizga tinchlik, fayzu baraka tilaymiz.

Hurmat bilan,
Ixtisoslashtirilgan ta’lim muassasalari agentligi jamoasi