* Тарих сабоғи

1989 йил 21 октябрдаги воқеалар. Халқимиз миллий тилимиз учун курашган мард, довюрак аждодларини ҳеч қачон унутмаслиги ҳамда жонажон тилимизни қадрлашни муқаддас бурч деб билмоғи лозим.

Уланиш учун: https://t.iss.one/ijod_bustoni

ТИЛИМИЗ — ЖОН ҲУЖАЙРАМИЗ

“Боришлиг-у келишлик”,
“Кетишлиг-у қолишлик” —
Урф бўлди бу сўзларни
Нуқул тилга “олишлик”

“Осонлаштириш” — осон,
Мушкул — “мушкуллаштириш”.
“Ишкал чиқди”, демаймиз,
Деймиз: “Ишкаллаштириш”.

Минбарга чиқса нотиқ,
Билолмайсиз ким экан.
Имом десак — ўхшамас,
Тилшунос олим экан.

Бағоят — “бағоятда”...
Айтайин қай бирини.
Ҳар ким ўзича ислоҳ —
Қилар она тилини.

Теле-радио-кино,
Қўятур китобларни.
Эшитмоққа кўникдик
Қуроқсўз, хитобларни.

Ижтимоий тармоқни
Бирров ўқинг, қани, сиз.
Ўзбекни ёзувимас,
Суратидан танийсиз.

Атамалар ҳам, майли,
Байналмилал сўз, деймиз.
Уларни ҳам хатолар —
Билан ёзиб, ўқиймиз.

Бош шаҳримиз Тошкентга
Сафар қилсам аҳёнда,
Юрган каби бўламан
Рим, Париж ё Лондонда.

Мир Алишер якқалам
Этган тилимиз қани?
Бу саволлар залвори
Мудом қақшатар мени.

Жажжи ўқувчи учун
Дарслик ёзар қоровул.
Қаранг, қозон бошида
Гўлахми ё қоровул?

“Тилга эътибор — элга
Эътибор” бўлса, ажаб,
Биз мудом бу аҳволга
Юрамиз лоқайд қараб.

Қонун бор, ижро чала,
Ким жавоб берар, ахир.
Унинг “туғилган куни”
Нишонланар йилда бир.

Ўшанда мақтанамиз,
Тилимизни улуғлаб,
Унинг беҳад имкони,
Бойлигини урғулаб.

Албатта, тилимиз бой,
Онамиздай улуғ у.
Ҳар сўз нон ушоғидай
Табаррук у, қутлуғ у.

Ўзбекни миллат қилган,
Халқ қилган шу тилимиз.
Тақдиримизни мангу
Ҳал қилган шу тилимиз.

Тил бузилса — бузилар
Миллатнинг қалби, онги.
Кундуз ҳам кўрингайдир
Тун мисоли қоронғи.

Тил бу — жон ҳужайрамиз,
Асрамоқ эмас осон.
Нобуд бўлган ҳужайра
Тирилмайди ҳеч қачон.

Сулаймон ШОДИЕВ

Уланиш учун: https://t.iss.one/ijod_bustoni

#Kun_hikmati

Ҳар доим ҳаракатда бўлинг. Зеро ҳаракатларингиз натижаси бир кун амалга ошади. Ҳаракат қилмасдан туриб ҳеч нарсага эришиб бўлмайди.

Buxoro.uz | Facebook | Instagram | YouTube