Hurmatli ustozlar, aziz yurtdoshlar!
 
Ona Vatanimiz istiqlolining 33 yilligi – mustaqillik bayrami barchamizga muborak bo‘lsin.

Muhtaram Prezidentimiz boshchiligida ozod diyorimizda har bir yil hamma sohada ulkan yutuqlar, tub o‘zgarishlar, xayrli natijalar bilan tarixga muhrlanayotgani bizni behad quvontiradi.

Ijtimoiy davlat deya atalgan Yangi O‘zbekistonimizdagi islohotlardan ko‘zlangan maqsad inson qadrini ulug‘lash, har bir yurtdoshimizga munosib turmush sharoitlarini yaratib berish, mamlakatimizni jahonning eng ilg‘or davlatlari safiga olib chiqishdan iborat.

Bu o‘zgarishlar albatta ertangi kun egalarining bugungi taʼlim-tarbiyasiga chambarchas bog‘liq.

Shunday ekan, kelajagimiz bunyodkorlarining har tomonlama barkamol voyaga yetishlari yo‘lida fidokorona mehnat qilayotgan qadrli yurtdoshlarimizga kuch-quvvat, sihat-salomatlik, ulkan zafarlar tilayman.

Osmonimiz hamisha bugungidek musaffo, yurtimiz tinch, xonadonlarimiz yanada fayz-u barakaga to‘lsin.

Barcha yutuqlarimizning poydevori, hayotbaxsh manbai sanalgan istiqlolimiz boqiy bo‘lsin!

Yana bir bor bayram muborak, azizlar!

Hilola Umarova
Maktabgacha va maktab ta’limi vaziri

#Bir_boʻlsak_yagona_xalqmiz
#Birlashsak_Vatanmiz

Aziz yurtdoshlar!
Jonajon O’zbekistonimiz, muqaddas Vatanimiz mustaqilligining 33 yilligi barchangizga muborak bo’lsin!

Muhtaram Prezidentimiz boshchiligida yurtimizda barcha sohalarda inson qadri, Vatan ravnaqi uchun olib borilayotgan islohotlar o’z natijasini ko’rsatmoqda. Ayniqsa, Yangi O’zbekiston yoshlari ta'lim, madaniyat, sport kabi yo’nalishlarda butun jahonda yuksak marralarni zabt etib, yurtimiz bayrog’ini ko’klarga ko’tarayotganidan qalbimiz faxr va iftixorga to’lmoqda.
Ana shu yoshlarni har tomonlama barkamol voyaga yetkazishga hissa qo’shayotgan har bir yurtdoshimizga mustahkam sog’lik, kuch-quvvat va omad tilaymiz.

Prezidentimiz yoshlarga alohida murojaat qilib "Marrani baland oling, siz buyuk ishlarga qodirsiz!" deya ishonch bildirdilar. Shu yuksak ishonchni oqlash yo’lida xalqimiz, yurtboshimiz - barchamiz birlashib aziz farzandlarimizni qo’llab-quvvatlaymiz.

Barchangizga yana bir bor erk va ozodlik bayrami muborak bo’lsin!

Hurmatli ustozlar,
Qadrli o‘quvchilar!

Avvalo barchangizni jonajon O‘zbekistonimiz mustaqilligining 33 yillik bayrami hamda bugungi yana bir katta shodiyona — “Bilimlar kuni” bilan samimiy tabriklayman.

Aytish lozimki, so‘nggi yillarda maktabgacha va maktab ta’limi tizimida olib borilayotgan izchil islohotlar natijasida sohadagi har bir jabhada katta o‘zgarishlar kuzatilmoqda. Bugun ta’lim tizimida mehnat qilayotgan yuz minglab ustozlarimiz bu islohotlar samarasini o‘z faoliyati misolida ko‘rmoqda, his etmoqda.

Muhtaram Prezidentimiz mustaqillik bayrami munosabati bilan yo‘llagan tabrigida bu fikrlarimizga hamohang ravishda Yangi O‘zbekistonni barpo etishda avvalo sifatli ta’lim tizimini yo‘lga qo‘yishni birinchi navbatdagi vazifa ekanligini alohida ta’kidlab o‘tdi. Shuningdek, “Muammolarimizning yechimi savollarimizning javobi faqat va faqat ta’limda. Hamma eshiklarni ochadigan kalit ham – faqat va faqat ta’lim va tarbiyadir” degan so‘zlari ham biz soha xodimlariga katta mas’uliyat va ishonch bag‘ishlaydi.

Bugun maktab ostonasiga ilk bor qadam qo‘yayotgan 700 mingga yaqin o‘g‘il-qizlarimiz hamda ularning ota-onalari, yaqinlari yuragidagi hayajon ular qatorida barcha ustozlarimiz qalbini ham egallagan desam, yanglishmagan bo‘laman. Zero, muqaddas maskan — ta’lim dargohiga bilim istab kelayotgan bolalarimiz bizning ertangi ishonchimiz, suyanchimizdir.

Aziz o‘quvchilar!

Yana bir bor barchangizni bugungi bayram, quvonchli kun bilan qizg‘in tabriklayman. Bilim cho‘qqilarini zabt etishda barchangizga katta muvaffaqiyatlar tilayman.

Hilola Umarova,
Maktabgacha va maktab ta'limi vaziri

#Mustaqillik_33_yil
#Bilimlar_kuni
BIR BO'LSAK - YAGONA XALQMIZ, BIRLASHSAK - VATANMIZ!

Xiva shahridagi Prezident maktabida “Bir bo‘lsak – yagona xalqmiz, birlashsak – Vatanmiz” shiori ostida mustaqillik bayrami va yangi qabul qilingan o‘quvchilarni tabriklash tadbiri o‘tkazildi. Tadbirda maktab jamoasi, ota-onalar, harbiy xizmatchilar, mehnat faxriylari ishtirok etdilar.
Karnay surnay ijrosi va maktab o'quvchilari tomonidan tayyorlangan badiiy chiqishlar yig‘ilganlarga bayramona kayfiyat taqdim etdi.
Tadbir so‘nggida o‘quvchilar birinchi qo‘ng’iroq sadolari ostida “Mustaqillik darsi” tomon kuzatildi.