Ilk kitob zavqi

Bugun Yozuvchilar uyushmasida yosh isteʼdod egalarini kashf etish va ularni qoʻllab-quvvatlash maqsadida “Birinchi kitobim” loyihasi doirasida chop etilgan 25 nafar yosh ijodkorlarning 25 nomdagi kitoblari tantanali taqdimot marosimi boʻlib oʻtdi.
Eng avval, yoshlar qizil yoʻlakda gullar, musiqa sadolari bilan tantanali kutib olindi. Shundan soʻng, marosimning asosiy qismi boshlandi. Tadbirni Oʻzbekiston Yozuvchilar uyushmasi raisi Sirojiddin Sayyid ochib berdi. Unda Oʻzbekiston Respublikasi Prezidenti Administratsiyasi Yoshlar siyosati departamentining rahbari Qahramon Quronboyev, Oʻzbekiston xalq shoiri Xurshid Davron, pedagogika fanlari doktori, professor Qozoqboy Yoʻldoshev, yozuvchi Maʼmura Zohidova, uyushma raisi oʻrinbosari Botir Ergashev soʻzga chiqib, mualliflarni ilk kitoblari bilan muborakbod etdi va ularga ijodiy parvozlar tiladi.
Maʼlumki, Oʻzbekiston Yozuvchilar uyushmasining 2018 yil 21 sentyabr kuni boʻlib oʻtgan yigʻilishi bayoni qaroriga muvofiq isteʼdodli yoshlarning «Birinchi kitobim» seriyasida nashrga tayyorlanadigan toʻplamlarini chop etish tartibi tasdiqlangan. Unga koʻra Respublika yosh ijodkorlarining anʼanaviy Zomin seminarida badiiy ijodning maʼlum yoʻnalishida oʻz ijodiy ishlari bilan ishtirok etgan yoshlar orasidan eng isteʼdodli qalamkashlarning ilk kitoblari ushbu loyihada koʻp ming nusxada chop etilib, butun mamlakatimiz boʻylab tarqatiladi.
Yozuvchilar, shoirlar, dramaturglar, adabiyotshunos olimlar, tarjimonlar ishtirok etgan tantanali marosimda mualliflarga qalam haqi va oʻz kitoblari topshirildi.
– Oʻtgan besh yil davomida loyiha doirasida Respublikamizning turli hududlarida yashab ijod bilan shugʻullanayotgan yangi isteʼdodlarni kashf etishga harakat qildik, - dedi yozuvchi Maʼmura Zohidova. - 162 nafar ijodkorning ilk mashqlari kitobchalar holida dunyo yuzini koʻrgan boʻlsa, 2023 yilda yoshlardan yana 25 nafarining ilk kitobi nashrga tayyorlandi va "Adabiyot" nashriyoti tomonidan 5000 nusxada chop etildi. Bugungi yoshlarimizga esa adabiyot olamida ulugʻ ustozlarimiz yoʻlini tilayman.
Aytish joizki, mualliflarning 16 nafari sheʼriyat, 7 nafari nasr, 1 nafari dramaturgiya va yana 1 nafar ijodkor badiiy tarjima yoʻnalishidagi kitobi chop etildi.
– Bugun juda katta hayajondaman. Ilk kitobim – “Chilzarra”ni qoʻlimga oldim, - dedi Iroda Rahmonaliyeva. – Unga 40 dan ortiq sheʼrlarim jo boʻlgan. Kitobimga Oʻzbekiston xalq shoiri Xurshid Davron soʻz boshi yozganlar. Botir Ergashev va Nargiza Asadova muharrirlik qilishgan. Barcha ustozlarimga cheksiz rahmatimni aytaman.
Tadbirda sanʼatkorlarning kuy-qoʻshiqlari yoshlarga yanada zavq ulashdi. Taqdimot marosimi yakunida mualliflar yigʻilganlarga “Birinchi kitobim” loyihasida chop etilgan kitoblaridan berdi.

Zulayho Ahmadjonova