Buxoroda tabiiy gazdan o‘g‘rincha foydalanayotganlar aniqlandi

Bugun energiya resurslaridan oqilona foydalanish, energiya tejovchi uskunalarni o‘rnatib, ularni tejash hamda xavfsizlikka rioya qilish maqsadida targ‘ibotlar kuchaytirilmoqda. Ammo shunday bo‘lishiga qaramay joylarda tabiiy gazdan noqonuniy foydalanib kelayotgan yo‘q emas.

"Hududgaz Buxoro" gaz taʼminoti filiali komplayens nazorat tuzilmalari tomonidan reyd tadbirlari amalga oshirildi. Tadbirlar davomida Buxoro shahar "Muxtor Ashrafiy" mahallasida istiqomat qiluvchi fuqaro X.S. xonadonida tadbirkor I.A. ga tegishli bo‘lgan novvoyxonada ro‘yxatdan o‘tmasdan, tegishli hujjatlarni rasmiylashtirmasdan, noqonuniy ravishda tabiiy gazdan foydalanib kelayotganligi aniqlandi. Holat yuzasidan dalolatnoma rasmiylashtirildi va 21,8 mln so‘mlik tabiiy gaz hajmi qayta hisob-kitob qilindi.

Shaharning yana bir manzili – Zarafshon Trakti ko‘chasi yo‘li yoqasida joylashgan fuqaro Sh.H.ga tegishli bo‘lgan bino ko‘zdan kechirilganida ham tabiiy gazdan noqonuniy foydalanish holati aniqlandi. Fuqaro tegishli tartibda ro‘yxatdan o‘tmasdan, tabiiy gazni noqonuniy ishlatgan. Qayta hisob-kitob ishlari amalga oshirildi va 7,8 mln so‘m miqdorida jarima belgilandi.

Jondor tumanidagi "Aleli" mahallasida istiqomat qiluvchi fuqaro V.B. xonadonida ham noqonuniy holat aniqlandi. Unga ko‘ra isteʼmolchi gaz hisoblagichdan oldin tushirma orqali tabiiy gazdan noqonuniy foydalanib kelgan. Qayta hisob-kitob amalga oshirildi va 3,4 mln so‘m miqdorida zarar yetkazilganligi aniqlandi.

Hozirda o‘rganilgan holatlar yuzasidan to‘plangan hujjatlar qonuniy baho berish maqsadida huquqni muhofaza qiluvchi organlarga topshirilgan.