#Ona tilimiz_35 yil

O‘zbek tili taraqqiyoti va targ‘iboti yo‘lidamiz!



“Ayni paytda aholi, ayniqsa, yoshlarimiz turli ma'lumotlarni asosan Internet va ijtimoiy tarmoqlardan olmoqda. Binobarin, ona tilimizni jozibali va qiziqarli tarzda taqdim etish, buning uchun o‘zbek tilining kompyuter dasturlarini, onlayn darsliklar, elektron lug‘atlarni yaratish kerak. Internet imkoniyatlaridan to‘liq foydalanib, o‘zbek tilini keng targ‘ib etish bo‘yicha ishlarimizni kuchaytirishimiz lozim. Davlat tili masalasi milliy g‘oyamizning asosiy tamoyillaridan biri bo‘lishi zarur. Yosh avlod qalbiga ona tilimizni bolalikdan singdirish maqsadida ta’limning barcha bosqichlarida o‘zbek tilini zamonaviy va innovatsion texnologiyalar asosida mukammal o‘rgatishga alohida e’tibor qaratishimiz lozim. Toki, bolalarimiz o‘zbek tilida ravon o‘qiydigan, ravon yozadigan va teran fikrlaydigan insonlar bo‘lib yetishsin».
Sh.M. Mirziyoyev

Bugun Fanlar akademiyasi O‘zbek tili, adabiyot va folklori institutida “O‘zbek tili taraqqiyoti va targ‘iboti” mavzusida respublika ilmiy-amaliy anjumani bo‘lib o‘tdi. Anjumanda institut olimlari, yosh tadqiqotchilar, tilimiz ertasiga befarq bo‘lmagan ziyolilar ishtirok etishdi. Anjumanning kirish qismida institut direktori Nizomiddin Mahmudov institutda tilimiz rivoji, istiqboli uchun qilinayotgan ilmiy izlanishlar, sa’y harakatlarga alohida to‘xtalib o‘tdilar. So‘zga chiqqan olimlar ham o‘zbek tili taraqqiyoti uchun faqat ziyolilargina emas, butun xalqimiz harakat qilishi lozimligini ta’kidlashdi. O‘zbek tiliga davlat tili maqomi berilganligining o‘ttiz besh yilligi munosabati bilan o‘tkazilayotgan ushbu anjumanda ishtirok etayotgan olimlar va izlanuvchilarning ilmiy maqolalari to‘plam sifatida chop etildi. Nizomiddin Mahmudov e’tirof etganlaridek “Til odam bolasiga muhtaram insoniylik rutbasini ato etgan muhtasham va muqaddas ne’matdir”. Tilimiz rivoji yo‘lida barchamiz birga harakat qilishimiz lozim!

Bizni ijtimoiy tarmoqlarda kuzatib boring👇

📌 Telegram|Facebook|Instagram|Youtube